OÉ-CUSSE, 15 jullu 2024 (TATOLI) – Autoridade Rejiaun Administrativa Espesiál Oé-Cusse Amben0 (RAEOA) implementa Community Based Maintenance (CBM, sigla ingés) atu halo manutensaun ba estrada rurál sira iha suku 18 ho kustu $102,500.00.
Notísia relevante: DRI no ADN fiskaliza uluk projetu 183 molok halo pagamentu
Programa ne’e CBM ne’e implementa hosi Diresaun Rejionál Infraestrutura (DRI), hodi halo manutensaun ba estrada iha klasifikasaun rua ba estrada ne’ebé aat natoon no aat totál ho distánsia kilometru 228 ba suku 18.
“CBM ne’e nu’udar programa komunitária, komunidade sira bele hadi’a estrada kuak no valeta sira, nune’e bele fasilita movimentu transporte bele la’o ho di’ak husi área rurál bele asesu mai iha merkadu,” Diretór Rejionál Infraestrutura , Remígio Nunu Sila, ba Agéncia Tatoli iha Oé-Cusse, segunda ne’e.
Nia informa, orsamentu ba programa CBM ne’e, prevee kedas iha Planu Asaun Anuál (PAA) planu OJE 2024 nian ho montante $102,500.00, fahe ba item rua primeiru ba programa CBM aloka $95,160.00 no item daruak ba materiál $7,340.00.
“Programa ne’e, autoridade lokál sira mak organiza komunidade halo serbisu, no akompaña husi tékniku obra públiku nian, no tarefa serbisu fahe ona, kada loron mandór selu ho $5 no traballadór husi komunidade hetan $3, ne’e fahe ba grupu,” nia salienta.
Jestór sub-rejiaun Oésilo, Benedito Ulan, agradese tanba estrada sira iha nivel suku no aldeia kondisaun grave.
“Programa ne’e importante, ha’u nu’udar autoridade lokál ami apresia tebes, tanba ita haree estrada sa’e ba sub-rejiaun sira liga suku kondisaun aat tebes, baleta sira nakonu ho fo’er entaun impaktu ba iha tempu udan bele akontese inundasaun, maibé ho programa ne’e komunidade bele hamoos, nune’e udan monu rai labele afeta ba estragu,” nia orgullu.
Notísia relevante:DRI Oé-Cusse inaugura projetu bee-moos fasilita populasaun iha Costa
Jornalista: Abílio Elo Nini
Editór: Evaristo Soares Matins
