OÉ-CUSSE 18 abríl 2023 (TATOLI) – Diresaun Rejionál Infraestrutura (DRI) liuhosi Departamentu Servisu Água Saneamentu (DSAS), Rejiaun Administrativa Espesiál Oé-Cusse Ambeno (RAEOA), tersa ne’e inaugura projetu sistema bee-moos iha aldeia Mahata, suku Costa, sub-rejiaun Pante Makasar hodi fasilita populasaun hamutuk 198.
Diretór Rejionál Infraestrutura, Candido dos Reis Amaral, informa, distánsia ba projetu ne’e hamutuk kilómteru 1.7, dada hosi liña distribuisaun bee-matan Oéla-Jak mai iha iha komunidade Mahata, hodi benefísia populasaun hamutuk 198 sei asesu liuhosi torneira unidade 17.
Nune’e mós fasilita fasilidade públiku sira, eskola bázika filiál Mahata, kapela Mahata, Polísia Unidade Marítima (UPM) no portu Mahata.
Nune’e husu populasaun sira iha aldeia Mahata, atu kontribui asegura investimentu públiku hodi uza ho durasaun tempu naruk.
Notísia relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”
“Investimentu bee-moos ne’e uza ba komunidade sira rasik no sei kanaliza ba to’o portuáriu Mahata, hodi fasilita pasajeiru sira, bee-moos ida-ne’e tuir tékniku sira halo ona ezame ba lobatóriu hatudu kualidade di’ak, entaun komunidade sira bele uza ba te’in no hemu,” Candido Amaral, ko’alia iha serimónia inaugurasaun ne’e.
“Saida presiza atu kontribui iha futuru, husu ba ita hotu atu kuida investimentu ida-ne’e ho didi’ak, tanba maluk sira-ne’ebé hela iha Mahata mak sai na’in no benefisiáriu direita, husu ita nia kontribuisaun kuida hodi uza bee-moos ne’e bele to’o tempu naruk,”nia fó hanoin.
Xefe suku Costa, Aleixo Abi, reprezenta komunidade Aldeia Mahata, reprezenta komunidade suku Costa hato’o agardese ba Autoridade RAEOA, tanba iha tinan 2023 ne’e, komunidade aldeia rua mak hetan fasilidade bee-moos.
“Ha’u lori komunidade nia naran agradese ba Autoridade no kompañia tanba dada bee-moos mai atu fasilita komunidade ira-nia nesesidade moris iha bairo Mahata, ha’u orgullu tanba iha suku Costa iha projetu bee-moos rua kanaliza hosi fatin dook hosi bee-matan iha foho mai hakbesik ba komunidade iha vila laran,” nia orgullu.
Agradese tanba Guvernu fó atensaun, suku Costa ih área Leolbatan, kanalizasaun kilómetru hitu, komunidade sira kontente tanba dezde tempu portugés to’o ohin loron mak foin hetan bee-moos.
“Ne’e Duni iha Suku Costa, ita la preokupa ona bee-moos, tanba ita-nia povu hotu hetan bee-moos ona, tán ne’e ha’u agradese tebes ba Obra Públika, tanba aprova duni ami-nia proposta ba nesesidade komunidade,” nia orgullu.
Projetu sistema bee-moos ne’e hosi empreza Maon-Muti, Unipesoál Lda ho valór kontratu hamutuk $234,881.98, Autoridade RAEOA aloka hosi Orsamentu Jerál Estadu (OJE) tinan 2022 nian ho durasaun servisu loron fulan-tolu.
Notísia relevante: Populasaun RAEOA 77% asesu ona fasilidade bee-moos
Jornalista : Abílio Elo Nini
Editór : Evaristo Soares Martins
