DILI, 07 agostu 2024 (TATOLI) – Governu liuhusi reuniaun Konsellu Ministru (KM), kuarta ne’e, iha Palásiu Governu, Dili, diskute no prova projetu rezolusaun Governu, ne’ebé aprezenta hosi Ministru Interiór, Francisco da Costa Guterres, kona-ba regra empeñamentu ba operasaun seguransa konjunta Forsa Tarefa Falintil – Forsa Defeza Timor-Leste (F-FDTL) no Polísia Nasionál Timor-Leste (PNTL), ba vizita Sua Santidade Papa Francisco mai Timor-Leste.
“Rezolusaun Governu ida-ne’e atu regulamenta uzu forsa hosi F-FDTL no PNTL durante operasaun seguransa konjunta. Uzu forsa tenke observa prinsípiu ba nesesidade, adekuasaun, proporsionalidade no respeita direitu no garantia sidadaun sira nian,” Ministru Prezidente Konsellu Ministru (MPKM), Agio Pereira, tenik.
Nia dehan, regra empeñamentu nian mak efetiva de’it hafoin autorizasaun espesífika hosi Komandu Forsa-Tarefa Konjunta.
Implementasaun ba regra sira-ne’e ho objetivu atu asegura operasaun seguransa ida-ne’ebé efikás no koordenada, hodi garante protesaun durante vizita Papa Francisco nian, iha tempu hanesan respeita direitu umanu no norma legál sira ne’ebé vigora.
Operasaun konjunta entre F-FDTL no PNTL sei permite resposta ida-ne’ebé rigorozu no koordenada liuhusi kualkér ameasa ba seguransa públika.
Notísia relevante:PN husu PNTL fó seguransa másimu ba vizita Papa Francisco iha TL
Jornalista: Hortencio Sanchez
Editór : Rafael Ximenes de A. Belo
