DILI, 12 Agostu 2024 (TATOLI) – Inséndiu iha foho-lolon sira, iha kapitál, kontinua akontese tanba falta konxiénsia husi populasaun balun, tanba ne’e, Ministériu Agrikultura, Pekuária, Peska no Floresta (MAPPF), liuhusi Diresaun Nasionál Floresta apela ba abitante sira atu kuidade ambinte no área florestál sira.
Diretór Nasional Floresta, Guilhermino Moniz, dehan sira halo ona identifikasaun ba inséndiu iha Dili ne’e iha area Manumeta Rai-hun, suku Vila Verde, Paiól-suku Lahane Osidentál noBekora-Kamea no Dare.
“Ita halo beibeik ona intervensaun ba inséndiu ne’ebé sempre akontese iha territóriu, espesialmente iha kapitál ne’e, maibé ema nia konsiénsia maka seidauk iha atu kuidadu Floresta, liu-liu iha foho leten sira”, nia realsa.
Tuir nia, atu ida ne’e kontinua akontese tanba komunidade hatene katak Ministériu Agrikultura nia rekursu limitadu atu halo intervensaun. Tanba ne’e, sira sempre uza maneira sunu rai iha tempu bailoro atu kuda fali ai-han iha tempu udan monu rai.
“Atividade sira halo to’os iha foho leten ne’e la bandu, tanba ida ne’e atu hametin rai hodi labele mosu inundasaun, maibé hahalok ida sunu rai ne’e maka loloos labele akontese, tanba nia impaktu negativu ne’e boot tebes”, nia esplika.
Tanba ne’e nia husu komunidade nia konxiénsia atu kuidadu ambiente, nune’e bele garante natureza Timór nian no bainhira udan monu rai labele akontese inundasaun no labele fó fali impaktu ba buat hotu ne’ebé maka moris iha rai ne’e.
“Meiu ida importante tebes ne’ebé Diresaun Floresta halo ona maka sosializasaun ba komunidade sira oinsá atu hetan informasaun adekuada kona-ba impaktu husi sunu no tesi ai iha foho sira, nune’e komunidade sira labele kontinua halo asaun ilegál sira ne’e”, katak.
Nia salienta katak parte Floresta sempre halo apreensaun ai sira ne’ebé komunidade tesi inklui prende ema sira ne’ebé sunu rai no sansaun ne’ebé fó maka sira tenke kuda fali ai hodi troka fali ai ne’ebé sira tesi ona.
“Ba sira ne’ebé sunu rai diresaun husu atu labele halo tan, tanba atividade ne’e bele estraga ambiente hotu no bele hamate ai-horis sira iha área referida no sei hamosu inundasaun ne’ebé sei fó perigu ba ema nia vida, nomós ba nasaun ne’e”, nia afirma.
Dirijente ne’e husu ba abitante sira atu koopera ho Diresaun Floresta hodi asegura ai-horis iha nasaun ne’e no nu’udar sidadaun ida ne’ebé di’ak kontribui ba kuidadu ambiente ida saudavel.
Notísia relevante: Presiza sensibiliza komunidade hodi evita sunu rai – Floresta
Jornalista: Tomé Amado
Editora: Maria Auxiliadora
