DILI, 19 agostu 2024 (TATOLI)–Primeiru Komadante Bombeiru Dili, Diego Angélo B. de Araújo, hateten profisionál korpu Bombeirus munisipiu Dili hamutuk 41 tuir simulasaun hodi bele halo intervensaun ba Papa Francisco nia vizita Estadu no pastorál iha Timor-Leste, iha 09-11 setembru 2024.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
“Ami komesa halo preparasaun simulasaun ho Cruz Vermelha Timor-Leste (CVTL) no Hospital Nasionál Guido Valadares (HNGV) ba vizita sua Santidade nian. Ami bein preparadu, se akontese insendiu ka akontesimentu ruma,” Primeiriu Komadante Bombeiru Dili, Diego Angélo B. de Araújo, hateten ba AgÊncia Tatoli, iha Caicoli, segunda ne’e.
Maske nune’e, nia dehan, iha profisionál korpu Bombeiru hamutuk na’in-tolu (3) mak iha kondisaun saúde ne’ebé la permite atu partisipa iha ekipa konjunta ba preparasaun amu Papa nian.
Nia esplika, ekipa Bombeiru komesa ajuda Polísia Nasionál Timor-Leste (PNTL) no Eletrisidade De Timor-Leste, Empreza Públiku (EDTL, E.P) hodi tesi ai sira-ne’ebé fó ameasa iha dalan pasajen Papa nian iha Kapital no Kamera Video Vijilánsia Polísia nian.
Primeiru komadante ne’e dehan, Bombeiru kordena hamutuk ho EDTL, E,P hodi taka enerjia eletrisidade oinsá bele hodi asegura enerjia atu labele inkomoda prosesu tesi iha kapital.
“Ami tesi ai ne’e durante loron tolu ona hanesan iha aeroportu Dili, Hotel Timor oin no katedrál ne’e, tanba ho razaun ida dalan sira-ne’e amu Papa atu liu. Ami la tesi hun, maibé ami aparu ai haat iha aeropotu Nicolau Lobato Dili, tolu iha Hotel Timor no rua iha Katedrál, tanba ho razaun razaun taka CCTV ne’ebé kapta imajen sira,” nia dehan.
Ekipa Bombeiru mós, nia hateten, fó apoiu PNTL hodi fornese bee ba iha postu PNTL sira-nian iha fatin sira-ne’e.
“Ami-nia preparasaun nian ne’e Bombeiru envolve forsa PNTL nian, hanesan fó apoiu bee ba postu konjunta iha Tasi-Tolu no inklui tesi ai ne’e,” nia dehan.
Bombeiru tesi ai 103 iha Dili
Nia hateten, husi janeiru to’o jullu tinan ne’e, ekipa korpu Bombeiru munisipiu Dili tesi ai ka aparu ai iha kapitál Dili hamutuk 103, liuliu iha fatin sira-ne’ebé ai sira fó ameasa ba ema-nia vida hanesan iha eskola, estrada públiku no klinikua.
“Ai sira-ne’ebé fó ameasa ba ema-nia vida liuliu ba komunidade nia uma privadu, populasaun, xefe aldeia no xefe suku tenke halo karta ba iha Bombeiru hodi bele tesi. Ami tenke haree no tetu didi’ak,” nia dehan.
Nia esplika, Bombeiru koopera ho Eletrisidade De Timor-Leste, Empreza Públiku (EDTL, E.P) mós hodi dezliga ka hamate ahi enerjia molok tesi ai sira-ne’e.
“Ami la tesi arbiru maibé ami haree ai sira-ne’ebé fó ameasa ba iha ema-nia vida umana. Ami serbisu tesi ai ne’e, bainhira ema mai direta iha ne’e no telefone mai,” Primeiru Komadante Bombeiru Dili ne’e hateten.
Primeiru komadante ne’e, hateten ekipa Bombeiru tesi ai ho nia hun bainhira ai sira-ne’ebé tohar rasik iha estrada sira.
“Ami tesi ai sira-ne’ebé tohar taka dalan no hanehan ema-nia uma ka edifisiu públiku sira-ne’e ami ba diretamente, la presiza koordena ho identidade ruma,” nia dehan.
Nia hateten, se iha orientasaun diretamente husi Primeiru-Ministru atu ba tesi ai fatin ruma, ekipa disponivel ba diretamente.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
