DILI, 27 Agostu 2024 (TATOLI) – Funsionáriu na’in-50 husi Ministériu Agrikultura, Pekuária, Peska no Floresta, Ministériu Komérsiu no Indústria no Sentru Lojístika Nasionál (CLN) partisipa formasaun téknika oinsá bele reforsa serbisu agríkola iha baze.
Fomasaun ne’e dirije husi formadór husi Xina, ne’ebé realiza durante loron 20, hahú husi 27 Agostu to’o 16 Setembru 2024, ne’ebé halo abertura ohin iha Dili no kontinua aban iha Manatuto to’o remata.
Ministru Agrikultura, Pekuária, Peska no Floresta, Marcos da Cruz, dehan funsionáriu ne’ebé tuir formasaun ne’e mai husi nasionál no munisípiu. “Sira ne’e maka sei fó apoiu tékniku iha baze hodi reforsa serbisu agríkola no halo manutensaun ba mákina sira ne’ebé fornese ona ba munisípiu sira”, Marcos da Cruz dehan iha salaun enkontru MAPPF, Comoro, ohin.
Kapasitasaun ba rekursu umanu ne’e foka liu ba agrikultura, pekuária, no akuakultura atu tékniku sira bele halo jestaun liga ba asegura rezultadu agríkola iha armazein. “Formasaun ne’e Ministériu Agrikultura realiza tanba hetan apoiu tékniku husi Governu Xina, liuhusi Ministériu Komérsiu no Dezenvolvimentu Rurál Xina nian, liuhusi akordu ne’ebé halo ona iha fulan sira ba kotuk”.
Governante ne’e dehan bainhira formasaun ne’e remata, husu atu funsionáriu na’in-50 ne’e fila mai Dili atu kada formandu bele prepara relatóriu atu halo aprezentasaun, nune’e ministériu bele halo sasukat ida kona-ba sira-ninia koñesimentu no kompriensaun kona-ba saida mak hetan iha formasaun durante loron 20 ne’e.
“Imi tenke foku tanba ha’u presiza imi idaidak sei mai halo filafali aprezentasaun mai ha’u depoizde imi remata formasaun iha Manatuto. Ha’u hakarak hatene husi formasaun ne’e saida mak imi hetan”, nia husu.
Iha sorin seluk, Konselleiru Embaixada Xina iha Timor-Leste, Zhao Suocheng, hateten atividade ida ne’e Xina organiza tanba iha kompromisu ho Governu Timor-Leste oinsá atu apoiu Timor-Leset hodi hasa’e koñesimentu timoroan sira liuhusi formasaun oin-oin iha área agrikultura, nune’e bele ajuda hasa’e produsaun iha rai-laran.
Zhao konfesa katak formasaun ne’e sei foku liu oinsá atu formandu sira bele iha koñesimentu adekuadu atu hatene oinsá kuda ho didi’ak no oinsá atu asegura nia rezultadu iha armazein sira, inklui kuidadu no halo jestaun di’ak ba mákina sira atu di’ak nafatin.
Reprezentante embaixadór ne’e husu ba formandu sira tau presta atensaun ba matéria sira ne’ebé tékniku sira aprezenta, nune’e bele ajuda halo dezenvolvimentu ida di’ak liu ba futuru. “Espera katak partisipante sira sei aproveita ho di’ak tempu sira ne’e hodi hetan benefísiu boot liu atu ajuda fali Ministériu Agrikultura hodi bele prodús ai-han tuir meta ne’ebé determina ona husi Governu Timór rasik”.
Atividade ne’e partisipa husi funsionáriu MAPPF na’in-40, Komérsiu no Indústria lima no Sentru Lojístika Nasional lima.
Notísia relevante: TL-Xina selebra akordu kooperasaun iha área investimentu ekonomia dijitál no dezenvolvimentu verde
Jornalista: Tomé Amado
Editora: Maria Auxiliadora
