DILI, 13 setembru 2024 (TATOLI)–Ministériu Edukasaun (ME) daudaun ne’e hein hela resposta husi Prezidénsia Konsellu Ministru (PCM, sigla portugés) kona-ba esbosu diploma uniforme eskolár.
“Uniforme eskolár sai preokupasaun boot ida, ne’e la’ós Diresaun Ensinu Sekundáriu de’it maibé nível eskolaridade hotu, prosesu la’o ona. ami konfirma esbosu diploma ba Gabinete Apoiu Jurídiku ME, sira enkamiña ona ba PCM, iha ne’ebá fó ona avaliasaun, apresisaun, komentáriu no rekomendasaun, hafoin lori mai ita-nia jurídiku, hadi’a ona, halo revizaun no enkamiña filafali ona ba Gabinete PCM, maibé seidauk hetan resposta husi sira. Ita hein desizaun,” Diretór Jerál Ensinu Sekundáriu Jerál iha ME, Deolindo da Cruz, informa iha ninia knaar fatin, Vila-Verde, sesta ne’e.
Nia dehan, bainhira ME hetan ona resposta, sei fó sai ba públiku no eskola sira.
“Iha ona resposta ruma ami bele fó ona informasaun ba públiku no eskola atubele hahú uniformiza. Ita labele promete katak tinan ida-ne’e ka tinan oin maibé ita hein de’it rezultadu husi Gabinete PCM tun mai mak ita bele fó sai,” nia akresenta.
Notísia relevante : Eskola hein desizaun husi ME ba uniforme eskolár
Diretór Eskola Ensinu Sekundáriu Jerál (ESJ) 05 Maiu Becora, Casmiro Dias Marques, husu ME aselera lalais uniforme eskolár tanba to’o agora estudante tinan letivu foun laiha uniformidade.
“Ita to’o agora seidauk prodús uniforme eskolár tanba desizaun husi Ministériu Edukasaun katak labele prodús ka haruka estudante sira suku lai farda foun hodi hein desizaun foun husi Governu, ba modelu farda ida de’it ba eskola sira iha territóriu tomak. Tanba ne’e mak ami la haruka estudante foun sira suku farda. Kleur loos ona, entaun ita husu ba Ministériu Edukasaun atu aselera lalais ona tanba estudante foun sira to’o agora laiha uniforme,” Diretór eskola tenik.
Eskola sira ezije atu aselera implementasaun uniforme eskolár.
“Tanba ne’e, ita hein desizaun husi Ministériu Edukasaun mak foin bele implementa, tama ona ba períodu datoluk ona mós ita-nia oan sira nafatin mai ho faru mutin no kalsa metan, entaun sira ketak loos ho estudante tuan sira-ne’ebé iha nanis ona farda molok Ministériu hasai sirkulár,” nia katak.
Jornalista : Osória Marques
Editora : Julia Chatarina
