DILI, 24 setembru 2024 (TATOLI) – Prezidente Asosiasaun Emprezariál Feto Timor-Leste (AEMTL, sigla portugés), Hergui Luina Fernandes Alves, hateten ahi han Bus Babadok Express iha kefa, Besnaen (Oenbit) banhira tula pasajeiru sira husi Kupang mai Dili.
“Ohin akontese ahi han Babadok Express iha kefa ne’eba bainhira tula pasajeiru mai Dili, entaun informasaun ne’e loos duni no pasajeiru ne’ebé mak iha bus laran iha na’in sia no sira mesak kondisaun di’ak hotu”, Hergui Luina Fernandes Alves, informa ba TATOLI via telefone, ohin.
Nia haktuir, Bus Babadok Express, antes ahi han, pasajeiru sira inklui kondutór halai sai hotu, sira ho kondisaun di’ak no asidente ne’e tama ona iha prosesu investigasaun.
Rekorda fali katak Asosiasaun Emprezariál Feto Timor-Leste (AEMTL, sigla portugés), hamutuk empreza 21 mak investe ba konsórsiu Babadok Translog. Bus Babadok Express ne’e rasik sosa iha nasaun Xina hamutuk tolu.
Asosiasaun Emprezariál Feto Timor-Leste (AEMTL, sigla portugés), investe kada bus ida ho valór $120.000 ne’ebé ba bus tolu hamutuk $360.000.
Jornalista : Felicidade Ximenes
Editór : Zezito Silva
