VIQUEQUE, 27 setembru 2024 (TATOLI)-Diretór Servisu Edukasaun Munisípiu Viqueque, Julio Sakadura, relata estudante hamutuk 3.248 hosi ensinu báziku, ensinu sekundáriu jerál no tékniku vokasionál iha Viqueque maka sei partisipa ezame nasionál iha fulan-outubru 2024.
“Kona-ba preparasaun ba ezame nasionál ami preparadu tanba foin lalais loron 18 ami halo enkontru ho diretór eskola EBC no sekundáriu sira iha munisípiu Viqueque, ami forma ona komisaun ba ezame nasionál nian. Nune’e komisaun ne’ebé ami forma ne’e hodi responde ba ezame nasionál ne’ebé sei akontese iha fulan-oin,”nia relata ba TATOLI,I.P, iha postu Viqueque Villa, ohin.
Hosi totál dadus ne’e, estudante EBC no EBF terseiru-siklu hamutuk 1.757, Ensinu sekundáriu jerál no Ensinu sekundáriu filiál hamutuk 1.401, no mós Ensinu Sekunáriu Tékniku Vokasionál hamutuk 90.
Nia dehan komisaun ne’e, envolve mós parte seguransa hanesan Polisia Nasionál Timor-Leste (PNTL), munisípiu Viqueque, no autoridade lokál iha postu administrativu lima hodi asegura seguransa durante ezame nasionál la’o.
“Ha’u hanoin ba materia ezame nasionál sira-ne’e ita-nia profesór sira fahe hotu ona ba estudante sira. Ha’u husu estudante sira tenke estuda no estuda, atu bele hetan valór di’ak iha ezame nasionál,” nia apela.
Nia esplika materia ezame nasionál ba estudante EBC sira maka matemátika, inglés, portugés, istória, jeografia, siénsia naturál no tetúm. Enkuantu ensinu sekundáriu jerál maka matemátika, ekonómia kuantitativu, inglés, portugés, kímika, istória, biolojia, sosiolojia, fízika, jeografia no tetun.
No móos ba ensinu sekundáriu tékniku vokasionál maka matemátika, ekonomia kuantitativu, portugés, fízika, kímika, sosiolojia, jeografia no sosiolojia, istoria no biolojia.
Jornalista : Vitorino Lopes da Costa
Editór : Agapito dos Santos
