DILI, 01 outubru 2024 (TATOLI)—Parlamentu Nasionál (PN), liuhusi reuniaun plenária aprova proposta rezolusaun Parlamentu Nasionál númeru 6/VI(1a)/2024 ratifika akordu entre Governu Repúblika Demokrátika Timor-Leste (TL) ho Governu Sua Majestade Sultão no Yang Di-Pertuan husi Brunei Darusalam kona-ba izensaun vistu ba titulár pasaporte diplomátika no ofisiál ka serbisu.
“Rezultadu votasaun afavór afavór 61, kontra no abstensaun zero, nune’e tratadu ne’e ratifikadu,” Prezidente Parlamentu Nasionál, Maria Fernanda Lay, fó sai iha sala plenária PN, tersa ne’e.
Tuir proposta rezolusaun PN hodi ratifika akordu entre Governu Repúblika Demokrátika Timor-Leste (TL) ho Governu Sua Majestade Sultão no Yang Di-Pertuan husi Brunei Darussalam kona-ba izensaun vistu ba titulár pasaporte diplomátika no ofisiál ou serbisu, ne’ebé konsidera relasaun amizade di’ak no kooperasaun entre TL ho Brunei Darusalan.
Ida-ne’e mós konta ho roteiru ba adezaun membru plenu TL ba ASEAN reflete espesifikamente no nesesidade rekoñesimentu mútua pasaporte diplomátiku no ofisiál ou serbisu entre Estadu membru organizasaun.
Ho konsiderasaun dezeju aprofunda mós relasaun ezistente no fasilita vizita ofisiál entre nasaun, liuhusi rekoñesimentu resíprosu pasaporte diplomátiku no ofisiál ou serbisu ba konsesaun izensaun vistu ba entrada no estádia até loron 14.
Ida-ne’e konsidera determinasaun TL iha implementasaun hodi kumpre instrumentu sira hotu ASEAN nian, nune’e tuir termu konstituisaun kompete ba PN atu ratifika akordu internsionál ne’e.
Governu aprezenta ba PN tuir abrigu iha alinea a) iha númeru 2) iha artigu 115 konstituisaun ho pedidu prioridade urjénsia hodi aprezenta proposta rezolusaun.
Ratifika akordu entre Governu Timor-Leste ho Governu Darussalam kona-ba izensaun vistu ba titulár pasaporte diplomátika no ofisiál ou serbisu ne’ebé asina iha Dili iha loron 20 Maiu 2024.
Jornalista : Nelson de Sousa
Editór : Cancio Ximenes
