VIQUEQUE, 01 outubru 2024 (TATOLI)- Xefe Sentru Saúde Viqueque Vila, Munisípiu Viqueque, João Corte Real, informa, iha trimestrál datoluk Sentru Saúde Viqueque Vila rejista pasiente ho moras infensaun respiratóriu (ISPA) ho númeru 13.177.
“Entre husi kazu tipu haat ne’ebé ami rejista ne’e númeru a’as liu maka ISPA hamutuk 13.177, kazu diáreia ne’e rejista hamutuk 1.685, kazu pneumonia rejista 551 no kazu moras seluk hamutuk 567, daudaun ne’e ami rejista no fó tratamentu ba pasiente sira”, João Corte Real, hateten ba jornalista sira, iha Sentru Saúde Viqueque Vila, ohin.
Nune’e, nia relata kazu ISPA númeru kontinua a’as tanba agora daudaun tama ona ba bainloron rai rahun mós barak fó impaktu maka’as ba komunidade sira.
“Kazu diareia ne’e mós kauza husi rai rahun kona modo tahan, depois ita-nia komunidade sira konsumu de’it, ida-ne’e mós fó impaktu hodi hamosu diáreia. Enkuantu, kazu pneumonia da’et mós husi kazu ISPA hanesan labarik sira hetan ona ISPA, maibé ita lakohi halo tratamentu sei liga ba moras pneumonia. Kazu hanesan isin katar, maibé númeru ladun ne’ebé sira mai tratamentu ami fó ai-moruk rekuperadu di’ak fila-fali”, nia afirma.
Liga ba tratamentu nia dehan, tratamentu ba kazu ISPA profisionál saúde sira fó ai-moruk, parcetamol, kazu pneumonia tratamentu antibiotiku.
“Kona-ba tratamentu medikamentu ba ami sufisientu hodi fó tratamentu ba ita-nia komunidade sira iha postu Viqueque Vila”, nia hato’o.
Tuir dadús profisionál saúde Viqueque Vila permanente na’in-87 no kontratadu na’in-23 kompostu husi enfermeiru, Doutor, Parteira, Farmasista no seluktán.
Jornalista : Vitorino Lopes da Costa
Editór : Florencio Miranda Ximenes
