OÉ-CUSSE, 09 Outubru 2024 (TATOLI) –Xefe suku Bobometo, José Labi Caet, informa reabilitasaun estrada husi empreza Irmão Timor Unipessoal Lda husi bairru Paut, aldeia Oébaha, suku Bobometo liga bá ponte Bitopa, suku Usitasa’e, sub-rejiaun Oésilo ho kustu $544.055,33 ne’e laiha kualidade.
Tanba ne’e, nia husu ba autoridade Rejiaun Administrativa Espesiál Oé-Cusse Ambeno (RAEOA), liuhusi Diresaun Rejionál ba Infraestrutura atu halo fiskalizasaun, nune’e bele identifika loloos kualidade obra ne’e.
“Konstrusaun estrada Paut to’o Bitana ne’e seidauk finaliza. La hatene kompañia lakohi atu kontinua finaliza ka tanba ita haree laiha kualidade. La’ós hanoin atu keixa malu, maibé ne’e ba ita hotu, la’ós ba ema ida ou ba Governu de’it, maibé ita hotu mak sei uza estrada ne’e. Tan ne’e, ha’u husu ba autoridade RAEOA, liuliu Obra Públika atu koloka tékniku sira mai haree katak obra ne’e tuir duni regra no BoQ nian ka la’e?”, José Labi Caet dehan ba jornalista sira iha Oé-Cusse.
Notísia relevante: Autoridade RAEOA mellora estrada foun iha Oésilo
Iha sorin seluk, xefe suku Usitasa’e, Tomás Ulan Colo, konsidera projetu ne’e la’o tarde no loloos ne’e konklui iha Marsu 2024 no projetu referidu persiza aumenta gabiaun.
“Projetu ne’e nia durasaun kontratu fulan sia de’it. Loloos remata ona iha Marsu 2024, maibé to’o agora seidauk finaliza no ita haree obra ne’e laiha kualidade, tanba simentu ne’ebé nahe nakfera fali ona no gabiaun mós laiha, ne’ebé tempu udan bele estraga estrada ne’e”, nia preokupa.
Xefe aldeia Oébaha, Marcelino Ole, konsidera projetu ne’e falta kualidade tanba empreza konstrui pedasuk de’it no fui simentu mihis liu hodi provoka rai-rahun, nune’e bainhira tempu udan sei danifika fali obra ne’e.
“Estrada husi Paut bá Bitopa nia kualidade ne’e ladi’ak, tanba sira nahe ne’e pedasuk-pedasuk de’it. Depois nahe [simentu] mihis liu no rai-rahun maka’as, ne’ebé ha’u husu ba Obra Públika atu bolu kompañia konstrutora ne’e aselera dalan ne’e, tanba agora Outubru. Kuandu tama Novembru udan ona, sei fó impaktu ba komunidade, tanba bee-dalan laiha, sei estraga mós estrada ne’e”, nia lamenta.
Notísia relevante: Progresu melloramentu estrada foun iha Oésilo atinje 25%
Diretór Rejionál Infraestrutura, Remígio Nunu Sila, konfirma katak parte Diresaun Rejionál Infraestrutura orienta ona empreza hodi kontinua halo reabilitasaun, nune’e bele garante kualidade projetu ne’e.
“Ita-nia ekipa monitoriza iha semana kotuk no sei kontinua halo monitorizasaun konjunta atu haree, tanba projetu la’o tarde no balun ongoing, balun paradu hela. Entaun, impaktu ba estrada kualidade laiha. Ho enjeñeiru sira ami haree ona no rekomenda ba kompañia atu hadi’a estrada ne’ebé kualidade laiha”, nia adianta.
Hatán ba rekomendasaun sira-ne’e, Diretór Irmão Timor, Júlio Mak, klarifika katak komunidade sira mak laiha konxiénsia, tanba empreza la autoriza atu ema ultrapa durante obra ne’e la’o.
“Ita taka dalan tanba foin cor, kalan sira [komunidade] loke fali no sira liu nafatin. Ita aviza liuhusi papan, maibé fokit sai tiha, sé mak sala?”, nia kestiona.
Notísia relevante: RAEOA reabilita estrada rejionál Oebaha liga ponte Bitopa ho kustu rihun $544-resin
Rekorde katak, projetu ne’e autoridade RAEOA lideradu Arsénio Paixão Bano, hatuur fatuk dahuluk iha loron 18 Jullu 2023, ho distánsia kilómetru 7,2. Empreza Irmão Timor mak ezekuta ho valór kontratu $544.055,33. Verba ne’e autoridade RAEOA aloka husi Orsamentu Jerál Estadu 2023 ho nia durasaun serbisu fulan sia, hahú iha Jullu 2023 to’o Marsu 2024.
Jornalista: Abílio Elo Nini
Editora: Maria Auxiliadora
