OÉ-CUSSE, 10 Outubru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) presiza hadi’a estrada ne’ebé kuaze aat iha tinan barak nia laran, iha Bairru Fatututa, aldeia Tumin, suku Bobometo, dehan xefe suku Bobometo, José Labi Caet.
Líder komunitáriu ne’e husu, liuliu ba Diresaun Rejionál Infraestrutura (DRI), atu halo normalizasaun estrada molok udan monu rai, nune’e bele fasilita movimentu ema no transporte sira iha sub-rejiaun Pássabe, Oésilo no Pante Makasar.
“Estrada husi Noel-Ekat sa’e mai to’o Fatututa ne’e área risku ba ita hotu. La’ós ha’u mak haree, maibé komunidade hotu observa direta, ne’ebé ha’u sujere ba Governu, liuliu Obra Públika tau atensaun tanba estrada ne’e dalan alternativa ida liga bá sub-rejiaun Pássabe no fó impaktu ba ema no transporte hotu. Tan ne’e, ha’u sujere bele halo hanesan PNDS sira halo ne’e”, José Labi Caet hateten iha sede suku Bobometo.
Notísia relevante: Reabilitasaun estrada Oébaha-Bitopa falta kualidade
Iha sorin seluk, Martinho Siqui nu’udar motorista preokupa tanba kondisaun estrada ne’e aat iha tinan barak ona, nune’e nia solisita ba autoridade RAEOA tenke hadi’a molok udan monu rai.
“Husu ba autoridade RAEOA tenke hadi’a, tanba kuandu to’o udan karreta no motorizada liu ladi’ak. Agora bailoron ita haree rai-rahun mahar loos, ne’e perigu ba sira ne’ebé lori motór no karreta, tanba ne’e tinan barak ona hanesan ne’e no nunka tau-matan”, nia lamenta.
Hatán ba preokupasaun sira-ne’e, Diretór Rejionál ba Infraestrutura, Remígio Nuno Sila, dehan reabilitasaun estrada husi sub-rejiaun Oésilo liga bá Pássabe ne’e ekipa téknika halo ona levantamentu dadus atu ateru urjentemente molok udan.
“Ekipa levanta ona dadus, tanba orientasaun husi Primeiru-Ministru ba Prezidente Autoridade, nune’e RAEOA liuhusi Diresaun Obra Públika bele normaliza estrada. Ita konta tiha ona, nia dezeñu BoQ prontu ona, maibé hein oinsá prosesu orsamentu, nune’e DRI bele implementa”, nia adianta.
Notísia relevante: Komunidade Oébaha husu Rogério Lobato kumpre promesa harii ponte iha Paut
Tuir observasaun jornalista Tatoli iha terrenu, estrada ne’e ameasada kotu iha tempu udan, tanba gabiaun ne’ebé konstrui iha estrada referida kuaze aat no monu ona.
Jornalista: Abílio Elo Nini
Editora: Maria Auxiliadora
