COVALIMA, 11 Outubru 2024 (TATOLI) – Autoridade Protesaun Sivíl (APC,sigla portugés) hamutuk ho autoridade Covalima no parseiru sira organiza kompetisaun pintura ba estudante ensinu báziku no halo simulasaun dezastre naturál, iha aldeia Akar-Laran, postu Suai, ho Tema “ Eskola Seguru no Komunidade ne’ebé Reziliente Hasoru Dezastre”.
Komandante Operasaun APC Covalima, Celestino Afonso Ferreira, dehan Autoridade Protesaun organiza kompetisaun pintura atu komemora Loron Internasionál ba Redusaun Risku Dezastre Naturál ne’ebé monu iha 13 Outubru.
“Ita haree akontese dezastre naturál ho tipu inundasaun afeta ba komunidade iha aldeia Akar-Laran. Nune’e, atu komemora loron ida ne’e presiza halo atividade simulasaun, nune’e bainhira akontese dezastre oinsá APC no ekipa prepara atu salva komunidade ne’ebé risku ba dezastre, nomós realiza atividade kompetisaun pintura”, Celestino Ferreira dehan iha Akar-Laran, ohin.
APC komemora loron risku ba dezastre naturál tanba hetan apoiu orsamentu $1.640 husi parseiru sira hanesan World Vision, Care International, Mercy Corps, CVTL no WFP.
Atividade kompetisaun pintura ne’e partisipa husi Eskola Bázika Suai Loro, Eskola Bázika Filiál (EBF) Audian, EBF Bakun no Laen-Tolu.
Kompetisaun ne’e hetan avaliasaun husi júri, ne’ebé rezultadu hatudu katak Eskola Bázika Sentrál Suai Loro mak sai manán-na’in ho valór 75, EBF Bakun ho valór 67, EBF Camnasa ho valór 65 no EBF Laen Tolu ho valór 62.
Hafoin fó sai rezultadu, reprezentante Prezidente Autoridade Covalima, João Martins, entrega prémiu ba manán-na’in ba kompetisaun pintura mak hanesan primeiru lugar hetan $20 ho kadernu, lapis, lapijeira, afiadór, régua; segunda lugar $10 no simu kadernu, lápis, lapijeira, afiadór, régua; terseiru lugar $5 ho ekipamentu eskola nia hanesan, no kuartu lugar simu de’it materiál eskola nian.
João Martins dehan autoridade sira komemora loron ne’e iha suku Suai Loro, iha aldeia Akar-Laran, tanba tinan-tinan inundasaun sempre akontese. “Ho atividade simulasaun ne’ebé hatudu husi Krús Vermella Timor-Leste ho kompetisaun pintura atu sensibiliza ita-nia alunu sira oinsá atu salva aan bainhira akontese dezastre naturál”, nia fó hanoin.
Iha sorin seluk, Koordenadór CVTL Covalima, Simplício Perreira, dehan komemorasaun ida-ne’e hodi bele fanu alunu no komunidade sira-nia konxiénsia, tanba Governu hamutuk ho parseiru sira prontu apoia bainhira akontese dezastre iha Covalima.
Loron Internasionál ba Redusaun Risku Katástrofe selebra, kada tinan iha 13 Outubru, ho intesaun atu konsensializa desizór polítiku no sidadaun sira ba implementasaun polítika públika ne’ebé evita ka mitiga okorrénsia katástrofe.
Iha 2024, tema ba selebrasaun data ne’e mak “Empoderamentu labarik no jovens sira ho objetivu ba konstrusaun komunidade reziliente liu ba katástrofe”. Tema ne’e asenta iha kapasitasaun labarik no joven sira, espesialmente liuhusi edukasaun, promove preparasaun ba proteje efeitu husi katástrofe no halo sira sai ajente ba mundansa, partilla saida mak aprende iha família no komunidade nia leet.
Tuir Organizasaun Nasaun Unida, dezde tinan 2000, labarik liu billaun ida mak nia vida perturba husi dezastre naturál. Eskola liu rihun 80 mak destruída ka danifikada no situasaun piora iha kada tinan. Katástrofe la’ós destrui de’it eskola no edifísiu sira, maibé impede labarik sira atu aprende, han di’ak, simu kuidadu saúde ne’ebé adekuadu.
Loron ne’e proklamadu iha Rezolusaun 64/200 adotada iha Asembleia Jerál ONU, iha 21 Dezembru 2009.
Jornalista: Celestina Teles
Editora: Maria Auxiliadora
