DILI, 15 outubru 2024 (TATOLI)–Diretór Ezekutivu Lao Hamutuk, Celestino Gusmão, husu Governu atu fó apoiu materiál no finanseiru ba foinsa’e grupu agrikultor sira-ne’ebé Governu investe ona no sai formandu ka alumni Arava Internasionál of Agricultor Training (AICAT) iha Israel ne’e.
Notísia Relevante: Alumni AICAT 40% kria ona empregu rasik
“Formasaun sira-ne’e importante atu aprende kona-ba produsaun no komérsiu, entaun oinsá Governu bele kontribui osan ba sira atu sira bele harii rasik sira-nia atividade produsaun. Ita boot sira haree programa AICAT ne’ebé timoroan ba Israel nia rezultadu mak Seloi Kraik iha Aileu ne’ebé timoroan barak iha ne’ebá halo produsaun orgániku iha ortikultura,” Diretór Ezekutivu Lao Hamutuk, Celestino Gusmão, hateten liuhusi konferénsia imprensa iha Bebora, tersa ne’e.
Nia hateten, rezultadu ba iha grupu produsaun ortikultura ne’e mak agora distribui ba iha loja sira-ne’ebé iha kapitál.
“Ami hakarak apresia ba inisiativa sira hanesan ne’e, Governu uza ida hanesan ezemplu atu investe di’ak liután,” nia hateten.
Aleinde ne’e, nia hateten, iha mós sentru produsaun balun iha munisípiu Viqueque ne’ebé alumni AICAT mak prodús no iha sentru formasaun sira hanesan iha rai-li’ur maibé halo produsaun adubu orgániku iha Ermera.
Iha fatin hanesan, peskizador Lao Hamutuk, Mariano Ferreira, konsidera programa sira hanesan ne’e importante, nune’e hein katak programa sira-ne’e tenke kontinua maibé situasaun reál akontese ne’e iha mak timoroan barak ba iha rai-li’ur no bainhira fila mai Timor-Leste labele absorve iha setór agrikultura.
“Governu halo investimentu rekursu umanu maibé la uza no jere rekursu sira-ne’e atu oinsá bele serbisu iha ministériu no hasa’e produsaun iha rai-laran, entaun ita bele gasta osan de’it,” nia hateten.
Tuir Lao Hamutuk nia haree, agrikultór sira barak mós mak idade aumenta ba beibeik no afeta ba sira-nia produtividade no Timor-Leste mós tenke hasoru impaktu boot husi mudansa klimátika ba setór agrikultura ne’ebé sei aumenta ba beibeik
Jornalista : Jasuina Xavier
Editór : Cancio Ximenes
