DILI, 17 outubru 2024 (TATOLI)—Komisáriu Komisaun Antí-Korrupsaun (CAC, siglá portugés), Rui Pereira dos Santos, kinta ne’e, fó pose ba Komisáriu Adjuntu CAC na’in-rua (2) atu tulun nia lideransa iha mandatu dahaat ba períodu 2024-2028, iha salaun Ministériu Justisa (MJ), Colmera, Dili,
Notísia Relevante: Komisáriu CAC nomeia Miguel Faria no Rosario Salsinha ba kargu Adjuntu
Nomeasaun ofisiál ne’ebé anúnsia iha Jornál Repúblika iha 11 outobru 2024 Série II, No. 41 ne’e), indika Rosario Salsinha Araújo ba Adjuntu Prevensaun no Sensibilizasaun no Miguel Acacio Faria ba Komisáriu Adjuntu Serbisu Apoiu no Kooperasaun.
Nomeasaun ba kargu iha CAC eskluzivamente mandatu Komisáriu nian bazeia ba Lei No. 8/2009, 15 jullu 2009.
Formasaun estrutura CAC nian ho ninian tarefa sira bazeia ba dekretu lei No. 23/2015 no dekretu Lei n.º 24/2015.
Estrutura ida-ne’e seidauk kompleta tanba Komisáriu Adjuntu CAC ba asuntu Investigasaun Kriminál kandidatu mai husi PNTL no Ministériu Públiku (MP), maibé infelizmente kandidatu husi PNTL lahetan autorizasaun husi Ministru Interiór liuhusi karta resposta komisáriu nian.
Kandidatu husi MP nian ne’e, depois iha sorumutu entre komisáriu Prokuradór Jerál Repúblika nian posibilidade sei mai iha tinan oin no Komisáriu Rui sei haruka karta ofisiál ba iha Konsellu Superiór Ministériu Públiku (KSMP).
Enkuantu, Rosario Araujo, nu’udar Espesialista Aníi Korrupsaun kareira iha instituisaun CAC ne’ebé hetan fiar husi Komisáriu Rui Pereira dos Santos iha mandatu dahaat komisáriu nian hodi asume kargu nu’udar Komisáriu Adjuntu ba Prevensaun no Sensibilizasaun.
Rosario Araujo iha ona esperiénsia natoon iha luta kontra korrupsaun hahú husi mandatu dahuluk Komisáriu nian funsionamentu iha tinan 2010.
Komisáriu Adjuntu ba asuntu Servisu Apoiu no Kooperasaun, Miguel Acacio Faria, nu’udar advogadu joven potensiál ne’ebé sei tulun mós Komisáriu, Rui dos Santos, iha parte administrasaun, finansa no kooperasaun esterna.
Ho esperíensia Komisáriu Adjuntu CAC na’in-rua ne’ebé iha lisiensiatura direitu sei tulun tebes Komisáriu Rui Pereira iha ninian kombinasaun koñesimentu, orizonte no esperiéensia husi líder prinsipál CAC nian ne’e hodi bele mellora tebes serbisu luta kontra korrupsaun iha rai Timor-Leste.
Ho toma pose Komisáriu Adjuntu na’in-rua ne’e, espera mandatu da-haat Komisáriu CAC nian sei hetan apoia polítika, finanseiru sufisiente hodi hala’o funsaun ho di’ak tuir lei, nomós bele kontribui rezultadu estratéjiku ida inovativu no refleta nesesidade nasaun Timor-Leste nian iha luta koletiva prevene no kombate korrupsaun.
Partisipa iha serimónia tomada posse Komisáriu Adjuntu CAC na’in-rua, Vise Ministru Justisa, Paulo Remedios, Prezidente Komisaun A iha Parlamentu Nasionál, Patrocinio Fernandes, Prokuradór Jerál Adjunto, Jacinto Babo, Prokuradór Jerál Adjunta Angelina Saldanha, Komisáriu Komisaun Funsaun Públika, Liurai Taci, Provedora Adjunta PDHJ, Maria Marilia da Costa.
Jornalista : Nelson de Sousa
Editór : Cancio Ximenes
