DILI, 25 outubru (TATOLI)–Komisaun Funsaun Públika (KFP), daudaun ne’e, rejista funsionáriu públiku no ajente administrativu iha territóriu ho idade 65 ihamutuk 2.235.
Iha 08 outubru 2024, Parlamentu Nasionál (PN) liuhusi reuniaun plenária aprova proposta-lei númeru 11/VI(1a)-Autorizasaun lejislativa iha matéria fisasaun limite idade ba relasaun serbisu funsionáriu públiku no ajente administrativu ne’ebé iha autorizasaun lejislativa ne’e define idade 65 reforma obrigatóriu.
Ba autorizasaun lejislativa ne’e hetan ona promulgasaun husi Prezidente Repúblika (PR) iha 15 outubru 2024.
“Iha autorizasaun lei ne’e ko’alia kona-ba reforma obrigatóriu ba funsionáriu públiku no ajente, iha ne’eba se ita ka’er husi idade 65, tanba númeru ne’e depende 60 ka 65. Maibé autorizasaun fó ne’e dehan katak tenke idade 65. Prontu, se ita ka’er ba idade 65, entaun agora daudaun iha 2.235 mak tama ona iha idade 65. Husi ne’e parese 40-resin ajente administrasaun,” Prezidente KFP, Agostinho Letêncio de Deus, hateten ba hodi responde ba Agência TATOLI iha resintu Parlamentu Nasionál, sesta ne’e.
Nia informa, Prezidente Repúblika promulga tiha autorizasaun lejislativa ne’e iha 15 outubru 2024 no daudaun komisaun prepara hela ona dekretu-lei sira oinsá implementasaun reforma obrigatóriu inklui diskusaun sira kona-ba bainhira mak hahú tama ba reforma inklui iha reintegrasaun ruma.
KFP hahú identifika ona bazeia ba sistema iha ministériu sira-ne’ebé mak funsionáriu barak liu no husi ne’e preparasaun ida tuir mai mak se reforma 2.235 karik presiza rekruta fali hira, entaun situasaun ne’e komisaun la ko’alia de’it reforma, maibé ko’alia mós etapa tuir mai hira mak tenke tama fila-fali no ministériu ida-ne’ebé mak reforma ba funsionáriu barak liu nune’e tenke halo estudu.
“Ne’ebé, dadaun KFP sei serbisu hamutuk iha ekipa entre KFP, Ministériu Finansa, Seguransa Sosiál atu bele haree hela funsionáriu sira-ne’ebé mak tama ona ba idade reforma,” nia dehan.
Jornalista : Nelson de Sousa
Editór : Cancio Ximenes
