DILI, 05 dezembru 2024 (TATOLI) – Ministru Justisa Sergio Hornai, hateten Governu planeia atu rekruta Juiz no Defensór Públiku estranjeiru 45 atu reforsa servisu justisa iha Timor-Leste.
Hornai rekorda, iha kuarta (5/12) horseik, Konsellu Ministru aprova alterasaun dahuluk ba lei rejime tranzitoriu hodi halo rekrutamentu majistradu judisiáriu husi estranjeiru. Desizaun ne’e atu Ministériu Justisa ezekuta polítika Governu nia.
¨Entaun ha’u fó porsaun por volta de 45 pessoas, maibé horsida husi Konsellu Superiór Majistradu Judisiáriu idak idak, Konsellu Superiór Majistradu, Ministériu Públiku no Konsellu Superiór Defensória Públika mak sei halo polítika hodi haree kona-ba ida-ne’e¨, Sergio Hornai dehan iha nia intervensaun bainhira sai oradór iha serimónia ho tema ¨Direitu Prizioneiru hodi asesu ba justisa ¨ ne’ebe organiza usi Asosiasaun HAK, iha salaun Centro Nacional Chega Balide, kinta ne’e.
Hornai dehan, rekrutamentu ida-ne’e la’os servisu Ministériu Justisa mesak de’it maibé Ministériu Justisa sei koordena ho Tribunál, Ministériu Públiku no Defensória Públika molok halo rekrutamentu.
¨Sira mak sei deside idak idak nia konsellu superiór, sei submete ba Ministru Justisa no sei lori ba Sentru Fórmasaun Juridika Judisiária mak sei haree¨, nia konklui
Jornalista: Natalino Costa
Editór : Zezito Silva
