DILI, 25 janeiru 2025 (TATOLI)—Kandidatu xefe suku eleisaun suku foun iha 2025, Ermelindo da Costa, eleitu sai xefe suku Tahu-Bein, postu administrativu Alas, munisípiu Manufahi, iha períodu 2025 to’o 2031.
Tuir rezultadu kontajen rezultadu votasaun ba eleisaun suku foun husi asembleia meza suku Tahu-Bein hafoin ramata eleisaun iha tuku 15h00 lorokraik ne’e hatudu, kandidatu úniku ne’e eleitu ho votu 506.
Xefe suku eleitu, Ermelindo da Costa, hateten sente kontente bele eleitu ba Xefe Suku Tahu-Bein no hato’o agradesimentu ba konfiansa hotu ne’ebé komunidade suku ne’e haraik ona ba nia liuhusi votasaun.
“Ha’u kontente tebes ba konfiansa husi parte hotu ne’ebé fó ona ba ha’u. Ha’u ho ha’u nia povu hato’o agradesimentu ba Governu Konstitusionál da-sia (IX) ne’ebé durante ne’e koopera ho ami hodi harii ami-nia suku foun ne’e,” Xefe Suku ne’e hateten ba Agência TATOLI liuhusi telefónika, sábadu ne’e.
Nia dehan, planu prioridade durante mandatu mak sei tau matan ba povu iha suku laran no buka dalan atu koopera ho admunistradór postu no Prezidente Autoridade Munisípál hodi dezenvolve suku ne’e sai di’ak-liu.
“Ha’u-nia planu prioridade mak servisu hamutuk ho adminitradór sira tantu postu no munisípiu no Governu sentrál atu dezenvolve suku ne’e. Ami-nia problema ne’ebé hasoru iha suku laran mak kondisaun estrada ne’ebé aat difikulta komunidade nia movimentasaun ba postu administrativu no munisípiu,” nia hateten.
Tanba ne’e, nia dehan, ho konfiansa ne’ebé povu Tahu-Bein fó ba nia ne’e, nia parte sei dedika aan tomak hodi serbí povu iha suku Tahu-Bein no sei sai matan no tilun hodi hato’o povu nia preokupasaun ba Governu lokál.
Entretantu, suku foun Tahu-Bein ho aldeia tolu mak hanesan aldeia Disuda, Tali Boot no aldeia Weda ho totál eleitór hamutuk 506 ne’ebé kompostu husi mane hamutuk na’in-275 no feto na’in-232.
Iha aldeia Disuda ne’e eleitór hamutuk 146 ne’ebé kompostu husi mane hamutuk 78 no feto hamutuk 68; Aldeia Tali-Boot iha totál eleitor hamutuk na’in-189 ne’ebé kompostu husi mane 106 no feto 83; Aldeia Weda iha totál totál eleitór hamutuk 171 ne’ebé kompostu husi mane 90 no feto hamutuk 81.
Enkuantu livru ba aldeia Disuda iha tolu (3) ho totál folla 150, aldeia Tali-Boot iha livru haat (4) ho totál folla 200 no aldeia Weda iha livru 19 ho totál folla 150 ho totál livru ba aldeia tolu ne’e iha 11 no folla iha 550.
Jornalista : Hortencio Sanchez
Editór : Cancio Ximenes
