BOBONARO, 28 janeiru 2025 (TATOLI)—Prezidente Autoridade Munisípiu (PAM) Bobonaro, Alexandre Pires, halo ona koordenasaun ho Governu sentrál liuhusi ministériu kompetente oinsá atu apoia karreta funeráriu hodi fasilita Diresaun Servisu Munisipál Asaun Sosiál Bobonaro, halo atendimentu transportasaun mate-isin ho másimu liután.
Notísia Relevante: Motorista hatún mate-isin iha dalan ho razaun klima ladi’ak
“Ba krareta prosesu la’o hela. Ha’u mós la nonook, ha’u komunika nafatin ho ministériu relevante atu apoia tan karreta funeráriu mai ita,” Nia hateten iha intervensaun relasiona ho komunidade nia preokupasaun kona-ba atendimentu karreta funeráriu iha Bobonaro ladún másimu, ba partisipante enkontru Konselu Koordenasaun Munisipál ne’ebé realiza iha salaun Maria Tapo, segunda (27 janeiru 2025) ne’e
PAM rekoñese, durante ne’e Diresaun Servisu Munisipál Asaun Sosiál la halo atendimentu to’o oras 24 nia laran, tanba problema limitasaun fasilidade no menus motorista.
“Rekruta tan motorista para halo turnu kalan ho loron, halo jestaun interna aumenta isentivu ba motorista sira. Di’ak-liu oras transportasaun iha Maliana laran ne’e oras 24 nia laran, duké ema leba mate-isin depois halo video tutuir dalan ne’e, problema mai ita,” nia dehan.
Atu responde preokupasaun ne’e, liuhusi reuníaun Konsellu Koordenasaun Munisipál (CCM, sigla portugés) diskute no aprova atendimentu karreta funeráriu durante oras 24 nia laran ho votu afavór 28 no kontra 10.
Nia hateten, atendimentu karreta funeráriu tenke iha oras 24 nia laran, tanba ema mate ne’e la’ós mate planeadu.
“Iha postu ninian iha tenke tetu. Se Balibo ho Cailaco ninia dalan di’ak, ita presiza atende kedas no la presiza limita oras. Se família aprezenta fatin ne’e iha Cailaco Goulolo, ita foti desizaun katak aban mak ba tanba dalan aat. Loos duni, mate ne’e ita la planu, mate kalan ho loron ne’e ita lahatene,” nia dehan.
Membru Konsellu Koordenasaun Munisipál (CCM) Bobonaro, atuál xefe suku Atudara, Manuel Ximenes, konkorda ho atendimentu oras 24 bia laran, maibé depende ba situasaun klima no kondisaun estrada.
“Ha’u fó sujestaun de’it, karreta funeráriu bele atende maibé situasaun udan hanesan ne’e, ita mós labele obriga. Ha’u fó ezemplu, mate iha Atudara foho, se mate iha kraik, ita hakoi lai iha ne’e no rai la nabeen. Prosesu kultura la’o, loron seluk mak bele lori ba foho leten. Se ita obriga loos mak karreta baku-fila, mate-na’in ida atu ba hakoi ne’e mós mate tan iha dalan,” nia hateten.
Enkuantu, daudaun ne’e Diresaun Munisipál Asaun Sosiál Munisípiu Bobonaro iha de’it karreta funeráriu rua (2) mak durante ne’e halo movimentu hodi transporta mate-isin.
Notísia Relevante: Covalima-Ekipa KRDN hetan mate isin ida iha Mota Raiketan
Jornalista : Sergio da Cruz
Editór : Cancio Ximenes
