DILI, 05 Fevereiru 2025 (TATOLI) – Ministru Interiór, Francisco da Costa Guterres, aprezenta projetu rezolusaun Governu nian, kona-ba define nesesidade rekrutamentu ba Polísia Nasionál Timor-Leste (PNTL) iha tinan 2025 no autorizasaun ba abertura konkursu públiku ba admisaun iha Kursu Formasaun Ajente no Kursu Formasaun Ofisiá. Projetu ne’e hetan ona aprovasaun iha reuniaun Konsellu Ministru.
Ministru Prezidénsia Konsellu Ministru, Agio Pereira, hateten medida ida-ne’e ho objetivu atu reforsa pesoál PNTL, hodi garante kapasidade operasionál ne’ebé boot-liu no prezensa polísia ne’ebé efisiente liu iha territóriu nasionál.
“Rekrutamentu ba ajente no ofisiál foun sira sei posivel atu rezolve defisit atuál iha rekursu umanu, hadi’a nivel patrullamentu no vijilánsia nian, atu nune’e kontribui ba reforsu seguransa públika nian. Nia objetivu mós atu promove renovasaun jerasionál husi instituisaun, hodi asegura kontinuidade no modernizasaun estrutura polísia nian”, esplika.
Governante ne’e salienta katak rekrutamentu ida-ne’e mós ho objetivu atu reforsa reprezentasaun PNTL nian, nune’e bele garante forsa polísia ida ne’ebé reprezenta liután iha diversidade nasionál, ne’ebé fundamentál atu estabelese relasaun konfiansa no proximidade ho komunidade oioin.
PNTL sei rekruta, iha tinan ne’e, membru foun hamutuk na’in-500, ne’ebé 400 sei tama iha Kursu Formasaun Ajente no 100 iha Kursu Formasaun Ofisiál.
Notísia relevante: Rekrutamentu membru PNTL foun sei anúnsiu iha 2025
Jornalista: Arminda Fonseca
Editora: Maria Auxiliadora
