DILI, 28 outubru 2024 (TATOLI)—Ministru Interiór, Francisco Guterres, informa rekrutamentu ba membru PNTL foun sei anúnsiu iha tinan 2025.
Notísia Relevante: Komandu PNTL hahú diskute rekrutamentu membru foun PNTL
“Rekrutamentu foun, ohin, ami mai fó hatene Deputadu sira katak tinan oin ami hahú no agora daudaun ami halo prepativu hela no tinan oin hahú anúnsia rekrutamentu. Kona-ba númeru, ami seidauk bele ko’alia didi’ak, tanba ami ho polísia haree fali númeru ne’e, mais o que certo 250 ba leten. Se ami bele konsege rekruta to’o 300 hanesan ne’e, ne’e sei di’ak-liu,” Ministru Interiór, Francisco Guterres, hateten ba jornalista sira hafoin halo audiénsia públika ba proposta Orsamentu Jerál Estadu (OJE) 2025 husi ministériu nian ho komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), segunda ne’e
Tanba ne’e, nia dehan, ministériu ho komandu jerál PNTL diskute hela no kona-ba orsamentu ba rekrutamentu ne’e prevee ona.
“Orsamentu prevee ne’e ba 250, mais ami buka hela jestaun tinan oin haree oinsá se ami konsege rekruta 300 di’ak liután hodi reforsa tan fronteira, tanba iha ne’e ami sei diskute internál,” nia dehan.
Nune’e, Governante ne’e dehan, to’o agora komandu PNTL seidauk fó sai formuláriu ruma nune’e bainhira anúnsia ona mak sei fó sai dokumentu ofisiál ne’ebé mai husi PNTL kona-ba rekrutamentu.
Jornalista : Nelson de Sousa
Editór : Cancio Ximenes
