KOVALIMA, 17 fevereiru 2025 (TATOLI) – Situasaun klima hamosu anin bo’ot rezulta uma-kain neen sai vítima ba dezastre naturál iha munisípiu Kovalima.
“Hahú janeiru to’o ohin loron akontese dezastre, ita rejista uma-kain neen mak sai vítima dezastre naturál ho tipu hanesan anin sobu uma no ahi han uma iha Kovalima”, Komandante APC Kovalima, Celestino Afonso Ferreira , relata dadus ba TATOLI, iha Santa Rosa, ohin.
Dezastre naturál ne’e, nia dehan, akontese iha Postu administrativu Suai, akontese iha Suku Suai Loro Aldeia Akar laran; anin sobu uma ida. Suku Kamenasa ahi han uma ida, Suku Beco ahi han uma ida.
Postu Fatululik Suku Taroman anin sobu uma ida, postu Fatumea iha suku Nanu anin sobu uma ida no postu Zumalai Suku Zulo anin sobu uma ida.
Durante anin boot iha janeiru to’o ohin loron ne’ebé ita rejista uma-kain neen vítima sora ne’e hetan ona apoiu emerjénsia ai ho laos ai han
Hafoin fó apoiu emerjénsia, ekipa sira kontinua halo verifikasaun uma-kain neen mak identifikadu sai vítima ba dezastre naturál no sira merese hotu atu hetan apoiu materiál ho tipu ne’ebé mak la hanesan. Tipu apoiu sira ne’e oferese ba kategória danu hanesan aat kmaan, aat naton no aat total.
Komandante mós fó hanoin ba komunidade sira, relasiona previzaun katak iha marsu sei akontese anin boot nune’e husu komunidade sira hadook aan husi fatin ne’ebé risku; ai huun boot ne’ebé besik uma presiza atu tesi nune’e labele afeita ba ema nia vida.
“Ha’u alerta ba xefe suku no xefe aldeia sira hato’o informasaun fó alarma antisipa ba komunidade nune’e komunidade sira bele hadook aan husi fatin risku nune’e ita bele salva ita-nia vida husi dezastre naturál,” nia apela.
Notísia relevante:APC rejista dezastre naturál 27 iha TL
Jornalista:Celestina Teles
Editór :Rafael Ximenes de A. Belo
