DILI, 20 Fevereiru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes, hateten relasiona ho lista sombra ne’ebé virál iha mídia sosiál kona-ba reestruturasaun membru IX Governu Konstitusionál ne’e hoax.
“Ne’e hoax. Resposta mak ne’e, hoax!,” Expedito hateten ba jornalista sira iha salaun Prezidénsia Konsellu Ministru (PCM-sigla portugés), Palácio do Governo, kinta ne’e.
Nia dehan, remodelasaun ne’e kompeténsia prerrogativa Primeiru-Ministru. Só Primeiru-Ministru mak bele pronúnsia oinsá mak nia bele halo remodelasaun ka reestruturasaun.
Notísia relevante: Vise PM Kalbuadi rejeita informasaun espalladu kona-ba lista estrutura Governu sombra
“Primeiru-Ministru konserteja fulan-fulan, semana-semana nia halo avaliasaun ba membru governu sira. Só Primeiru-Ministru mak hateten presiza ka lae halo remodelasaun, tanba Primeiru-Ministru mak Xefe Governu,” nia esplika.
Governante ne’e informa katak imposível Primeiru-Ministru halo remodelasaun tanba membru governu sira hala’o ninia serbisu tuir planu ne’ebé IX Governu define. “Membru governu la’o tuir hela planu asaun ne’ebé IX Governu trasa,” nia tenik.
Jornalista: Natalino Costa
Editór: Xisto Freitas da Piedade
