ERMERA, 01 Abríl 2025 (TATOLI)-Ministériu Agrikultura, Pekuária, Peskas no Florestas (MAPPF) liuhusi programa Sustainable Agriculture Productivity Improvement Project (SAPIP) – Projetu Hadi’a Produtividade Agrikultura Sustentável, entrega mákina modernu ba grupu agríkola tolu iha suku Asulau Sare, Postu Hatólia A, Munisípiu Ermera.
Komunidade suku Asulau Sare, iha ninia populasaun hamutuk na’in 2.566, ne’ebé moris iha agríkola ho pursentu 80% no iha Munisípiu Ermera no úniku suku Asalau Sare mak iha potensialidade setór agrikultura kuda hare ne’ebé barak ho ektare 416.
“Ohin ha’u mai iha ne’e, hamutuk ho autoridade lokál sira no komunidade, ami hotu iha ne’e, mai atu halo lansamentu ba utilizasaun mákina modernu”, Ministru Agrikultura, Marcos da Cruz, informa ba jornalista sira iha, Ermera, suku Asulau Sare, ohin.
Ministru hatutan, ekipamentu sira mak hanesan, hands traktor ba fila rai nian, ida seluk uza hodi kuda hare no ko’a hare nian, no ida ohin lansa daudaun ne’e ba kuda hare.
“Hanesan ita hotu-hotu hatene kuda hare ne’e iha tempu-naruk, husi uluk to’o agora ita-nia agrikultór sira kuda hare ne’e, ida kari de’it ka kuda ho liman, sira balun komesa kuda ona, mas kuda arbiru de’it kuda la ho liña”, Ministru akresenta.
Agora ne’e, tuir governante ne’e, kuda hare ho mákina, kuda hare tuir liña ho idaidak no halo fasil liután serbisu agrikultór nian. Katak, reduz tempu kuda hare nian no mós reduz kustu ba kuda hare nian.
Iha fatin hanesan, Prezidente Autoridade Munisípiu Ermera, José Martinho dos Santos, agradese no orgullu tanba bele hetan ona apoiu mákina modernu sira.
“Ohin ita ko’alia mudansa husi agrikultura sira tradisionál ba agrikultura modernu, ida-ne’ebé uluk ema kuda ho liman de’it, i lori karau mak halai, ohin loron ita iha mákina la’ós kuda de’it, iha mákina para ko’a hare”, líder munisipál ne’e hateten.
Ekipamentu sira ne’e, Estadu halo kooperasaun ho parseria internasionál sira tanba ne’e husu ba grupu agríkola sira atu uza ho kuidadu mákina sira-ne’e nune’e bele dura to’o tempu-naruk.
Nune’e mós tuir Xefe suku Asalau Sare, Jaco Menezes Carmona, kulturalmente, komunidade durante ne’e, hare ne’e sira kuda tradisionál, dalaruma tenke utiliza ema barak, pois tenke uza kustu ne’ebé barak. Maibé, ho apoiu ne’e bele rezolve ona nesesidade komunidade nian, bele hamenus ona serbisu no gastus osan sira ba atividade kuda hare.
“Ho lansamentu ida-ne’e, ha’u hanoin komunidade mós bele sente kontente. I, tradisionalmente, ita kuda dalaruma ektar ida ita bele kuda ba loron rua ka tolu maibé ita halo lansamentu mákina modernu, ita kuda ohin, nia oras rua bele purvolta ba ektar ida”, nia konsidera.
Iha oportunidade ne’e, Armando Martins Soares, reprezenta grupu agríkola sente orgullu ho apoiu makina modernu ne’e no sente buat foun ida no mós husu atu makina sira labele para de’it iha fatin.
“Komunidade Asulau la’ós ami grupu tolu ne’e de’it maibé ami barak. Se bele, kontinuasaun ne’e sei nafatin”, nia husu.
Nia énfaze, apoia ne’e labele to’o de’it iha ne’e tanba mákina sira-ne’e ba grupu Asilau seidauk to’o. Presiza iha kontinuasaun no presiza mós halo morru protesaun atu proteze irigasaun, nune’e bee labele sobu natar.
Entretantu, totál akipamentu modernu agríkola ba suku Asulau Sare hamutuk, sanulu kompostu husi mákina hands tractor tolu, ko’a hare tolu no kuda hare iha neen, ho totál orsamentu milloens 148.550 USD.
Atividade distribuisaun apoiu ne’e marka prezensa husi Prezidente Autoridade Munisípiu Ermera, Diretór Agrikultura Ermera, Administradór Postu Hatólia A, Komandante Segundu Batallaun F-FDTL, Komandante PNTL, Ekstesionista Agríkola, Grupu Agríkola no komunidade.
Jornalista: Alexandra da Costa
Editór: Rafael Ximenes de A. Belo
