DILI, 09 Abríl 2025 (TATOLI) – Konsellu Ministru nomeia ohin membru no Prezidente Konsellu Jerál Institutu Politékniku Betanu (IPB) nian.
Tuir dokumentu husi Governu, totál Konsellu Jerál, órgaun governasaun prinsipál IPB nian, mak órgaun kolejiál ida ne’ebé kompostu hosi membru na’in-13, hanesan estabelese ona iha estatutu instituisaun nian.
Husi totál ida-ne’e, membru na’in-tolu hetan nomeasaun husi Konsellu Ministru, nu’udar personalidade esterna ho méritu rekoñesidu, laiha ligasaun ho IPB ka administrasaun públika direta, no ne’ebé hetan rekoñesimentu iha área relijioza, privadu no orden profisionál ne’ebé relevante ba programa sira ne’ebé oferese husi Institutu.
Membru na’in-tolu ne’ebé hetan ona nomeiasaun ba Konsellu Jerál maka hanesan Brígida Antónia Correia, nu’udar personalidade ho méritu entre orden profisionál no Prezidente Konsellu Jerál, Inaciu da Kosta, nu’udar personalidade ho méritu iha aspetu relijiozu, no Alberto Carvalho Araújo, nu’udar personalidade ho méritu iha setór privadu.
Jornalista: Arminda Fonseca
Editora: Maria Auxiliadora
