DILI, 07 Abríl 2026 (TATOLI)—Ekipa Administrasaun Navegasaun Aérea Timor-Leste (ANATL) normaliza ona bee nalihun iha baranda Aeroportu Internasionál Prezidente Nicolau Lobato, Komoro.
Diretór ANATL, Heddy Fernandes, hateten, ohin hafoin udan-boot bee tama to’o Aeroportu maibé ekipa konsege rezolve.
“Bee iha rotunda Nicolau Lobato ne’e halai tuun hotu mai ho volume bee ne’ebé boot, drainajen sira labele simu bee ho di’ak no hanesan ita hatene katak rai iha aeroportu ne’e mós haliis uitoan, entaun ami-nia espasu ida iha baranda ne’e mós iha hela faze konstrusaun, entaun bee nalihun tama bá laran, maibé ohin ami normaliza hotu ona ne’ebé kondisaun laiha buat ida,” Diretór informa ba Ajénsia TATOLI via telefónika, Tersa ne’e.
Notísia relevante : Waskita Karya hahú projetu konstrusaun pista iha aeroportu Komoro
Nia esplika, kondisaun ohin ne’e la fó impaktu ba servisu operasionál iha aeroportu, nune’e aviaun sira mós semo hanesan baibain.
Diretór ne’e garante katak sei fó atensaun másimu, nune’e ba oin sei la akontese tan problema hanesan.
“Tamba ne’e, husu mós ba parte kompetente atu rezolve ka hadi’a drainajen iha parte rotunda Nicolau Lobato ho espasu boot atu bee bele nalihun ho di’ak no la’o tuir nia dalan atu labele afeta fali ba aeroportu laran,” nia katak.
Jornalista : Alexandra da Costa
Editora : Julia Chatarina
