DILI, 26 Abríl 2025 (TATOLI)—Líder Igreja Protestante iha Timor-Leste, Pastór Lourenço dos Santos, husu timoroan sira nafatin esperansa halo orasaun ba Papa Francisco nune’e buras nafatin iha vida espirituál.
“Ita nafatin esperansa halo orasaun ba Amu-Papa no saida mak Amu-Papa lori mai Timor nafatin buras no kuda iha ita-nia nasaun liuliu vida espirituál hodi fó dame ba ita nafatin no buras nafatin bá-oin,” Pastór Lourenço do santos informa ba TATOLI via telefónema, sábadu ne’e.
Nia dehan, Maromak nafatin fó bensaun ba povu Timor-Leste liuliu ba líder nasaun ida-ne’e nian hodi nafatin iha esperansa, maski iha tristeza nia laran tanba líder Kreda Katólika iha mundu tomak ramata ona nia peregrinasaun.
Notísia relevante: Falesimentu Papa Francisco hanesan lori tristeza ba mundu tomak
Nia lembra mensajen ne’ebé mak Amu-Papa husik hela mai TL mak dahuluk tenke atensaun no kuidadu ba lafaek iha rai-maran no iha tasi.
“Ida-ne’e atu dehan katak ita timoroan atu nafatin iha unidade, tau-matan ba joven sira tanba ema barak mak tama iha Timor ne’e lori sira-nia kultura no buat ne’ebé mak oinoin ne’ebé iha tendénsia estraga ita-nia unidade no halakon ita-nia valór kultura nian,” nia konklui.
Jornalista: Felicidade Ximenes
Editór: Xisto Freitas da Piedade
