DILI, 29 Abríl 2025 (TATOLI) – Konfederasaun Sindikatu Traballadór Timor-Leste, sei selebra loron mundiál ba traballadór iha tinan 2025 ho tema “Promove traballu dignu nu’udar sentru ba dezenvolvimentu sosiál no ekonomia iha Timor-Leste; Hasa’e saláriu mínimu, kriasaun empregu, garantia kombate esplorasaunP”.
Loron mundiál traballu iha loron, 01 fulan-Maiu, ita selebra nu’udar loron vitória ba luta ne’ebé naruk husi tempu ba tempu no husi jerasaun ba jerasaun, ne’ebé sei nafatin hakilar iha mundu kona-ba harii dame, hametin demokrasia, direitu no servisu dignu ba ema hotu.
“Iha loron 01 fulan-Maiu iha bandeira nia okos, ita hotu sei hamutuk ba liberdade, ita hotu sei hakilar nafatin ba justisa, ita hotu sei hakilar ba saláriu dignu, ita sei hakilar ba direitu no ita sei hakilar nafatin hodi kontra hahalok kanten husi osan-na’in sira”, Portavós KSTL, Frangelina Soares Aparício perante ba jornalista sira iha edifísiu KSTL, Bemori, Dili, ohin.
Nune’e iha loron traballu ida-ne’e, tuir KSTL, ita hakarak fó onra no sakrifísiu no kontribuisaun husi servisu na’in (traballadór) hotu husi setór sira hotu tanba sira mak erói foun ba dezenvolvimentu iha Timor-Leste.
“Ba traballadór sira ne’ebé hala’o servisu iha parte otelária, servisu públiku, komérsiu sira, no servisu profisionál sira, tanba konsidera nu’udar ajente ba transformasaun sosiál ho forsa traballu sira-ne’e hotu hala’o papél ativu hodi lori mudansa ba sosiedade no ekonómia”, membru KSTL ne’e hateten.
Nia hatutan, kona-ba tema ne’ebé mensiona, sei liga ba problema saláriu mínimu no produtividade, problema empregu iha rai-laran, atu garantia direitu traballadór nian no halakon forma hotu husi esplorasaun ida-ne’e refleta duni ba ita-nia preokupasaun durante ne’e.
“Ho nune’e, iha loron mundiál ne’e, KSTL nafatin eziji ba Governu atu promove no investe ba programa traballu dignu iha polítika Governu nian, tanba traballadór sira-nia perspetiva kona-ba traballu dignu nu’udar sentru ba dezenvolvimentu sosiál no ekonómiku”, nia informa.
Tanba ne’e KSTL afirma katak, traballu dignu bele akomoda aspirasaun ema hotu nian iha vida profisionál, traballu dignu sei envolve oportunidade atu hetan empregu ne’ebé mak produtivu no sei fó rendimentu justu, garantia seguransa iha servisu fatin, no protesaun sosiál ba família sira.
“KSTL afirma preokupasaun hirak-ne’e ho ezijénsia ba Governu hanesan, Governu tenke hasa’e saláriu mínimu nasionál ho urjentemente, Governu atu kria empregu iha rai-laran, parte Governu mós atu kria lei regulamentu no ratifika konvensaun ba traballu, protesaun ba direitu no kombate esplorasaun no promove diálogu sosiál”, Portavós
Entretantu iha loron mundiál ba traballadór ne’e, husi Konfederasaun Sindikatu Traballadór Timor-Leste (KSTL), sei hala’o marsa hahú husi Bemori, ba diresaun Mandarin konklui iha Palásiu Governu, aleinde ne’e sei halo parada iha Dili laran.
Jornalista: Alexandra da Costa
Editór: Rafael Ximenes de A. Belo
