OEKUSI, 29 Abríl 2025 (TATOLI) – Abitante sira iha Huabanais, aldeia Sabén, suku Bobometo, sub-rejiaun Oésilo, aprezenta kestaun balun ba Primeiru-Ministru, Xanana Gusmão, atu konsidera liuliu kona-ba problema falta bee-moos no estrada.
Aleinde ne’e, hato’o mós kona-ba projetu reabilitasaun estrada kilómetru hitu iha Huabanais ne’ebé presiza nahe simentu no alkatraun.
Problema sira ne’e levanta husi Xefe Aldeia Sabén, Abílio Ili, iha ámbitu diálogu durante oras ida ho primeiru-ministru, iha bairru Huabanais, tersa ne’e.
“Agradese ba Governu tanba tinan ne’e hadi’a ona ami-nia dalan, maibe ami husu presiza hadi’a mós estrada iha bairru Sabén, nune’e komunidade mós bele kontente, tanba tempu udan rai tahu maka’as difikulta transporte sira halo movimentu. Estrada ne’e suku lima mak asesu, tan ne’e ami husu primeiru-ministru tau-matan ba ami-nia problema sira-ne’e”, dehan.
Notísia relevante: Autoridade RAEOA ho Lian-na’in realiza seremónia kulturál hodi reabilita estrada rurál iha Sabén
Kona-ba falta bee-moos, tuir xefe aldeia, iha Sabén kada tinan hasoru problema bee-moos, maske iha bee-matan, maibé presiza halo kanalizasaun ba komunidade atu asesu bee ho
Martinho Liu nu’udar lia-nain husi bairru Kabun, rekomenda ba xefe Governu atu haree mós projetu reabilitasaun estrada rurál iha bairru Huabanais no nia husu presiza nahe ho simentu no alkatraun.
“Ami kontente tanba Governu rezolve ona ami-nia dalan ne’e, maibé ami hakarak nahe ho simentu no tau alkatraun, kuandu aterru de’it ho ra sei aat fila-fali”, nia sujere.
Hatán ba rekomendasaun sira-ne’e, Primeiru-Ministru, Xanana Gusmão, promete sei prevee iha Planu Asaun Anuál (PAA) tinan tuirmai.
“Ohin, ha’u haree ona estrada ne’e, haree buat ida rai-rahun. Ha’u haree mós iha estrada rai monu, la’ós akontese iha ne’e de’it maibé iha mós rai boot. Ohin, husu atu tau alkatraun ka simentu, maibé ha’u dehan de’it katak ita agora atu tama ona fulan-Maiu ba Juñu”, Xanana responde.
Xefe Governu ne’e hatutan katak osan ba tinan ida aprova bainhira kada munisipíu lori planu rasik kona-ba estrada, bee-moos, ponte no eletrisidade hira mak atu harii iha tinan ida nian no presiza osan hira. Ida-ne’e mak tenke haree didi’ak atu tau iha planu orsamentu hodi lori bá Parlamentu Nasionál foin aprova, nune’e iha Janeiru mak foin implementa.
“Tan ne’e, agora ita iha ona tinan ida nia klaran, kuandu ita dehan tau alkatraun, simentu atu ajuda populasaun hodi la’o ba mai, ita implementa iha tinan seluk. Ita tau osan mak hadi’a tiha, ne’e duni ha’u lahaluha, ita Setembru 2025 ne’e, komesa ona diskute orsamentu husi fatin-fatin, ita sei haree ida-ne’e”, nia promete.
Notísia relevante: KAFI Oekusi aprova projetu emerjénsia 26 ho kustu millaun $36-resin
Jornalista: Abílio Elo Nini
Editora: Maria Auxiliadora
