BOBONARU, 30 Abríl 2025 (TATOLI)—Abitante sira iha aldeia Halekou, suku Ritabou, postu administrativu Maliana, munisípiu Bobonaru, durante ne’e enfrenta problema menus bee-moos tanba distribuisaun bee husi bee-matan Raebo-Anan ladún másimu.
Notísia Relevante: SEKooP kuda Bafo-Kayrala ektar rua iha Halekou Ritabou
Problema ne’e akontese tantu tempu udan no iha tempu bai-loro, tanba ema deskoñesidu estraga hotu sistema kanalizasaun bee-moos ne’ebé Cruz Vermellha Timor-Leste (CVTL) no Parseiru Chilfund instala.
Abitante Halekou, Abilio Maia Santos Barros, konfirma kada-loron obrigatóriu komunidade tenke la’o-ain ho distánsia kilómetru ida hodi buka bee iha bee-matan no mota atu uza ba nesesidade loro-loron.
“Ami transporte iha ne’e mak mai kuru iha Tanke Achu-Brau, sira transporte laiha ne’e pasiénsia halai ba kuru iha bee iha mota ne’ebé husi uma la’o to’o distánsia 200 hanesan ne’e. Ami kuru iha tanke mós bee sai kiik,” Nia informa ba jornalista sira, kuarta ne’e.
Nia klarifika, problema menus bee-moos ne’e mós afeta tebes ba estudante sira liuliu famíliá vuneravél.
“Uluk bee di’ak, agora kanalizasaun ladi’ak, kanu sira aat hotu ona. Tanba ne’e, ami husu ba Governu, ami-nia bee ne’e tenke mantein nafatin, nune’e bele sustenta ami-nia família, atu nune’e ami-nia oan sira ba eskola. Se lae, dadeersan, sira atu fase oin ba eskola mós araska, balun dalaruma troka tiha, oin la fase, ba ona eskola,” nia dehan.
Alende ne’e, abitante Rofino Valente reforsa problema ne’e akontese kle’ur ona maibé sira laiha kbiit atu rezolve tanba maiória komunidade aldeia Halekou morís ho vida agrikultura no balun vuneravél inklui defisiénsia.
Rofino sente triste tanba durante ne’e inan isin-rua no labarik ki’ik sira mós konsumu de’it be husi mota.
“Udan ka bailoro, ami sempre tama mota-oan tanba bee-mota ne’e tun para tiha. Entaun, ita kee iha mota-ninin depois Bee-Moos mak kuru ita hotu-hotu ba konsumu. Ami sira kuru iha mota ne’e tanba transporte laiha, ida-ne’e mak falla boot ba ami. Dalaruma inan isin-rua, labarik ki’ik sira mós la’o ba buka bee. Tanba me’e mak ami husu Governu atu tau atensaun ba ami-nia problema ne’e, hodi rezolve iha tempu badak,” nia hateten.
Xefe aldeia, Domingos Mau-Lelo, afirma problema ne’e kuaze akontese tinan haat ona no ekipa husi parte kompetente mós haree ona ho matan maibé to’o agora seidauk rezolve.
“Ha’u seidauk halo proposta tanba sira ekipa saneamentu haree ona. Sira hateten mai ha’u dehan di’ak hela tempu ida ita sei resolve. Entaun ho ida-ne’e mak ha’u mós hein to’o agora, maibé ha’u sei ba direta ko’alia ho Servisu Agua no Saneamentu,” nia dehan.
Totál Populasaun iha aldeia Halekou hamutuk 726 no xefe família hamutuk 149 no uma kain hamutuk 83.
Notísia Relevante: Abitante aldeia lima iha Ritabou difisil asesu fasilidade saúde
Jornalista : Sergio da Cruz
Editór : Cancio Ximenes
