DILI, 30 Abríl 2025 (TATOLI)-Ministériu Edukasaun (ME), liuhusi Diresaun Servisu Edukasaun Munisípiu Dili, notifika okupante arredór eskola iha territóriu Dili hahú semana ne’e.
“Semana ne’e bele notifika ona okupante sira tanba antes ne’e ita aprosima ona ho sira iha Eskola 10 Dezembru, Komoro. Ita hein de’it despasu husi Prezidente Autoridade Dili Interinu”, Diretór Servisu Edukasaun Munisípiu Dili, Sabino da Costa Pereira, hatete ba TATOLI iha Delta Nova, kuarta ne’e.
Nia reforsa kona-ba okupante ne’e presiza tebes Prezidente Autoridade Munisípiu Dili ho Ministériu Edukasaun nian, nune’e bele fasilita notifika hodi hamamuk fatin.
“Nune’e ita-nia estudante sira bele tuir prosesu aprendizajen ho di’ak, tanba komunidade iha arredór la fó seguru ba estudante no mós manorin labele foka hanoin tanba barullu”, nia dehan.
Maibé kona-ba eskola seluk iha Dili, nia dehan ne’e servisu edukasaun munisípal kontinua halo planu hodi aprosima no husu sira-nia opiniaun.
“Prosesu aprosima ho eskola seluk kontinua prepara. Ida-ne’e halo fazeadamente, tanba presiza kolaborasaun, koordenasaun entre Governu ho komunidade. Tanba atu iha solusaun ne’ebé di’ak ne’e presiza ita hotu nia apoiu”, katak nia.
ME rejista daudaun ne’e uma-kain hamutuk 72 okupa hela arredór eskola iha munisípiu Dili, husi totál ne’e uma-kain 52 hela iha arredór eskola ensinu báziku ho nia filiál sira, restante okupa iha eskola ensinu sekundáriu jerál no tékniku vokasionál.
Komunidade okupa eskola báziku Sérgio Vieira de Mello, 10 Dezembru, ensinu báziku filiál númeru 5 Komoro, ensinu báziku sentrál 30 Agustu, eskola ensinu sekundáriu jerál 04 Setembru UNAMET Balide, EBC Bidau Akadiru-hun, eskola sekundária tékniku vokasionál indústria no teknolojia Bekora no eskola sira seluk tan.
Notísia relevante: Okupante aredór EBC 10 Dezembru Komoro prontu koopera ho governu
Jornalista : Osória Marques
Editora : Rita Almeida
