DILI, 16 maiu 2025 (TATOLI)–Antigu-Prezidente Repúblika no atuál Prezidente Partidu Frente Revolucionária do Timor-Leste Independente (FRETILIN), Francisco Guterres Lú Olo, hateten ho padre Domingos da Silva Soares “Maubere” nia mate ne’e, Timor-Leste lakon kombatente ne’ebé la sura kolen no lakon bibi atan di’ak ida.
Notísia Relevante: Marí Alkatiri: “Padre Maubere kombatente ida ba libertasaun”
“Timor-Leste lakon nia bibi atan di’ak ida no mós kombatente ida ne’ebé la sura kolen, ho matenek no brani tebes,” Prezidente FRETILIN ne’e hateten liuhusi nia pájina ofisiál facebook ne’ebé Tatoli asesu, ohin.
Antigu Prezidente Repúblika ne’e dehan, Pe. Maubere lider igreja ida-ne’ebé defende kauza nasionál husi tempu ne’ebé lahanesan to’o ohin dadeer hakotu nia iis iha Hospitál Nasionál Guido Valadares (HNGV).
“Nia mak ita-nia aman, maun Amu Domingos Maubere. Profunda Condolência ba família enlutada! Deskanse em Paz!” Lú Olo dehan.
Notísia triste envolve ona família alargada Igreja Katólika Timor-Leste no liuliu komunidade Katólika iha Dili kona-ba luta-na’in ba libertasaun nasionál, defensór direitu umanu no justisa, Domingos da Silva Soares “Maubere”, Pároku Becora, iha sesta (16 Maiu 2025), iha tuku 07h05 dadeersan.
Padre Domingos Maubere hakotu iis iha Ospitál Nasionál Guido Valadares (HNGV), hafoin halo tratamentu intensivu iha Unidade Kuidadu Intensivu (ICU) dezde 08 Maiu 2025 ho kondisaun grave.
Pe. Domingos Maubere ne’ebé koñesidu nu’udar servidór espirituál ba komunidade katólika no kombatente ba liberdade, defensór ba direitusumanus no justisa, hakotu iis ho idade 73.
Antes ne’e, Pe. Domingos Maubere ninia kontribuisaun no partisipasaun ba Viqueque boot tebes liuhusi bainhira Amu Maubere sei assume kna’ar nu’udár Pároku iha Ossú no área misaun ne’ebé kobre área Vikeke tomak hanesan Vikeke Villa, Luka, Lakluta, Uatulari no Uatukarbau, hodi kuda fini fiar evanjellu ne’ebe to’o ohin moris no buras ba nafatin.
Notísia Relevante: Padre Domingos Maubere hakotu ona iis
Jornalista : Hortencio Sanchez
Editór : Cancio Ximenes
