DILI, 19 Maiu 2025 TATOLI (TATOLI) – Prezidente Fundasaun Meskita Annur, Abdullah Said Sagran, hatete katak importante tebes ema hothotu halo promosaun ba valór amizade no paz iha Timor-Leste.
Abdullah Said Sagran hato’o deklarasaun ne’e relasiona ho Aniversáriu Restaurasaun Independénsia ba da-23, ne’ebé selebra iha 20 Maiu, ho tema “Hametin Paz no Dezenvolvimentu”.
“Iha 20 Maiu, ita komemora tinan 23 Restaurasaun Independénsia. Ita tenki agradese ba Na’in Maromak, tanba ita hetan independénsia. Timor mós hetan nia dignidade hamutuk ho nasaun sira seluk iha mundu rai klaran ne’e”, nia hato’o ba TATOLI, iha Kampung Alor, Dili.
Dirijente relijiozu ne’e reafirma importánsia husi Dokumentu Fraternidade Umana asinadu husi Papa Francisco no Imam boot, Al-Ahzhar Ahmad Al-Tayyeb, iha abu-dabhi, iha loron 04, fulan-fevereiru, tinan 2019.
Nia lembra katak Ministériu Eduksaun hahú elabora ona kuríkulu eskolár ho objetivu hodi inklui valór fraternidade umana, ida ne’e marka pasu pozitivu hodi fó mahon ba komunidade relijioza sira hotu iha Timor-Leste.
“Objetivu hodi ita bele kria amizade, toleránsia, paz no hetan moris di’ak no laiha konflitu entre ita. Ha’u haree ida ne’e furak tebes”, Abdullah Said Sagran akresenta.
Tuir líder musulmanu ne’e, maioria timoroan hotu katóliku, kompara ho sidadaun sira husi relijiaun seluk, maibé ho asinatura Dokumentu Fraternidade Umana iha Dubai, bele aplika husi “alkuran sagradu hodi bele sai mata dalan ba umanidade”.
Notísia relasionada: Pastor Lourenço: deputadu sira tenki kria unidade no promove fraternidade umana
Jornalista: Jesuína Xavier
Editora: Isaura Lemos de Deus
