DILI, 22 Maiu 2025 (TATOLI)—Xefe Departamentu Forénsiku Hospital Nacional Guido Valadares (HNGV), Nilton Tilman, hateten ekipa Forénsiku finaliza ona autópsia ba matebian Ronaldinho Mota Ximenes no entrega ona bá família hodi haloot matebian tuir tradisaun.
“Ohin ita hahú autópsia iha tuku 10:30 Otl no ramata tuku 13:00 no ita enterga kedas ba família hodi haloot,” Nilton Tilman dehan ba jornalista sira, iha nia kna’ar fatin, Mortuáriu, HNGV, Dili, kinta ne’e.
Nia esplika autópsia ba matebian Ronaldinho Ximenes ne’e la’o ho di’ak, tanba ekipa Forénsiku liuliu espesialisa sira tun tomak no servisu di’ak tebes no ikus entrega ba família.
“Relatóriu finál sei relata ba Tribunál no ita-boot sira sei hetan hotu kedas resposta sira-ne’ebé ita boot sira husu. Entaun, iha momentu ne’e, ha’u labele fó informasaun sira-ne’ebé liga ho autópsia ne’e, tanba ne’e segredu justisa no kazu sira-ne’e mós iha hela prosesu laran,” nia informa.
Notísia relevante: Aban, Forénsiku HNGV halo autopsia ba matebian Ronaldinho Mota Ximenes
Nilton esplika, antes atu halo autópsia ba matebian Ronaldinho, ekipa médiku sira hasai uluk raiu-xís tanba atu hatene ninia kanek ne’e iha-ne’ebé, ezemplu, ema tiru iha ulun entaun métodu ida-ne’e atu ajuda Tribunál sira atu foti desizaun, depois husi rezultadu raiu-xís ne’e sei guia ka fó informasaun ba peritu sira katak autopsia ne’e atu lokaliza ninia posizaun ne’e iha-ne’ebé.
Jornalista: Felicidade Ximenes
Editór: Xisto Freitas da Piedade
