KOVALIMA, 23 Maiu 2025 (TATOLI) – Autoridade Maukatar fó hanoin xefe suku, komunidade no intelektuál sira atu serbisu hamutuk hodi dezenvolve postu Maukatar no evita uza mídia sosiál hodi hatuun malu.
“Ha’u husu atu hakbesik malu tanba ha’u mesak labele. Ita hamutuk mak ita bele. Ba intelektuál hotu, hakbesik ha’u, tau ideia hamutuk hodi dezenvolve ita-nia postu Maukatar, nune’e atu labele hatuun postu liuhusi media sosiál”, Administradór Postu administrativu Maukatar, Laurentino de Jesus fó hanoin ba xefe suku no komunidade sira hato’o nia apelu ne’e ba jornalista iha suku Ogues, ohin.
Autoridade postu ne’e fó atensaun katak atitude uza mídia sosiál hatuun ema –hahalok ida-ne’e veteranu sira sei la apoiu ba aktu referidu, tanba uza mídia sosial hodi hatuun postu administrativu Maukatar ida-ne’e la’ós hatuun pesoál ba administradór postu maibé hatuun postu Maukatar.
“Ita presiza serbisu hamutuk ho igreja tanba ita-nia prosesu ukun rasik aan liuhusi igreja ho nune’e labele kontra Igreja tanba igreja mak lori ita dezenvolvimentu ba ukun rasik aan”, nia hatutan.
Nia fó hanoin ba konsellu suku atu estabelese ona asembleia postu bainhira iha baze buat balun la di’ak submete proposta ba iha postu nune’e hala’o enkontru Asembleia atu halo aprovasaun, tanba proposta husi xefe suku tolu mak hetan aprovasaun.
Laurentino kontinua lidera Maukatar ho intensaun hakarak dezenvolve postu administrativu Maukatar tanba haree kondisaun estrada grave.
“Ho nune’e nia mandatu fó prioridade atu hadi’a estrada tanba ami-nia produtu lokál nia ladun folin tanba haree ba kondisaun estrada aat. Prosesu atu hala’o dezenvolvimentu iha postu mai husi xefe suku sira tanba programa Governu mai husi xefe suku sira”, nia dehan.
Xefe suku hili direta husi povu liuhusi eleisaun suku, nune’e atu haree povu nia moris di’ak iha baze hodi submete proposta ba postu hafoin kontinua submete proposta ba iha munisípiu.
Postu administrativu Maukatar iha-nia suku haat mak hanesan Suku Belekasak, Matai, Ogues no Suku Holpilat.
Jornalista:Celestina Teles
Editór: Rafael Ximenes de A. Belo
