VIKEKE, 27 Maiu 2025 (TATOLI)—Prezidente Autoridade Munisípiu (PAM) Vikeke, Francisco C.S de G. Soares, informa autoridade halo identifikasaun fatin atu establese Balkaun Úniku iha munisípiu Vikeke.
“Kona-ba fatin establesementu balkaun úniku, ita identifika ona fatin iha antiga sekretáriadu GIZ ne’ebé lokaliza iha suku Karaubalu, postu Vikeke. Kona-ba balkaun úniku ba munisípiu Vikeke sei konstrui iha tinan 2025 ne’e nia laran. Tan ne’e, fatin ita iha ona no hein prosesu implementasaun,” Francisco C.S de G. Soares hateten ba Agência Tatoli, iha postu Vikeke Vila, ohin.
Autoridade ne’e dehan, konstrusaun balkaun úniku ne’e ninia orsamentu mai husi nasionál, entaun ba munisípiu Vikeke-nian ne’e, parte nasionál prevee ona orsamentu totál hamutuk rihun $75.
“Ba konstrusaun balkaun úniku, parte nasionál prevee ona orsamentu ne’ebé tuir planu ita sei implementa iha fulan-Setembru 2025,” nia dehan.
Estabelesementu balkaun úniku sei benifísia ba povu munisípiu Vikeke, tanba durante ne’e laiha balkaun úniku ida ne’ebé fasilita populasaun iha Vikeke trata dokumentu ruma, tenke halai tun-sa’e foin trata sira-nia dokumentu.
“Tanba ne’e, ha’u sente, ba estabelesementu balkaun úniku ne’e sei ajuda ita-nia komunidade, la presiza halai ba Baukau no Dili mak trata dokumentu sira hanesan pasaporte no dokumentu sira seluk. Ho nune’e, liuhusi balkaun úniku sei fasilita ona ita-nia inan-aman sira, atu hetan trata sertidaun moris, Billete Identidade, kartaun eleitorál sira,” nia hateten.
Balkaun Úniku hanesan inovasaun ida iha fornesimentu informasaun no servisu públiku ba sidadaun sira no mós setór privadu sira.
Balkaun úniku hanesan modelu servisu foun ne’ebé oferese atensaun personalizada iha espasu fíziku ida-nee’ebé úniku iha nível lokál.
Nune’e mós, promosaun ba kultura inovadora iha prestasaun servisu ba Administrasaun Públika, tanba objetivu Balkaun Úniku atu redús burokrásia no koerupsaun, simplifika prosedimentu sira, aselera no moderniza prestasaun servisu públiku sira.
Iha ninia versaun digitál, Balkaun Úniku hanesan fonte konfiável ida no seguru ba asesu informasaun kona-bá prosedimentu ba asesu servisu públiku, konstitui hanesan feramenta importante ida ba transparánsia ativa.
Tuir dadus, populasaun munisípiu Vikeke totál hamutuk 102,637 (prosesaun 2019), munisípiu Vikeke postu lima (5) kompostu husi Lakluta, Uatukarbau, Ossú, Uatulari no Vikeke Vila.
Jornalista : Vitorino Lopes da Costa
Editór : Cancio Ximenes
