KOVALIMA, 12 Juñu 2025 (TATOLI) – Autoridade Protesaun Sívil (APC-sigla Portugés) Munisípiu Kovalima apela ba vítima dezastre ne’ebé simu ona materiál rekuperasaun husi Governu atu rekonstrui hikas ona sira-nia abitasaun.
“Dala barak ita-nia Estadu laran di’ak bainhira komunidade hetan afeitadu ba dezastre naturál buka meiu hodi fó apoiu materiál rekuperasaun atu rekupera hikas komunidade sira-nia uma maibé balun simu tiha la konstrui uma”, Komandante APC Munisípiu Kovalima, Celestino Ferreira Afonso apela ba vítima sira, bainhira entrevista ho profisionál komunikasaun sosiál sira, iha Kovalima, ohin.
Tuir rezultadu monitorizasaun ekipa APC Kovalima nota katak vítima dezastre balun to’o ohin loron seidauk halo rekonstrusaun ba sira-nia rezidénsia tanba saida seidauk hatene – iha informasaun balun mós fa’an materiál ne’ebé Governu fó apoiu.
Ho nune’e autoridade postu administrativu, Xefe Suku ho xefe aldeia hamutuk kontrola komunidade oinsá atu hadi’a sira-nia moris.
APC fó tempu fulan rua ba vítima dezastre naturál ne’ebé mak simu ona materiál rekuperasaun maibé seidauk rekonstrui hikas uma durante fulan kontinua la konsege finaliza, APC sei prosesu bazeia ba baze legál balun ne’ebé mak regula ona.
Fó hanoin fali, molok ne’e Komandante APC Kovalima sesante Flavio Mendes fó sai dadus vítima dezastre naturál 2022-2023 katak APC rejista vítima dezastre naturál hamutuk 139 ho tipu dezastre narurál rai-halai hitu, ahi han uma haat, anin sobu komunidade nia uma 128.
Prosesu APC halo verifikasaun hetan estragu ho tipu sira hanesan aat kmaan 67, aat naton 24 totál 47 ne’ebé hetan ona apoiu materiál rekuperasaun.
Dadus vítima dezastre naturál iha 2024 ne’e hamutuk uma-kain 88 ne’ebé prosesu hela atu hetan materiál rekuperasaun.
Notísia relavante:Vítima dezastre naturál iha Kovalima simu ona materiál rekuperasaun
Jornalista:Celestina Teles
Editór: Rafael Ximenes de A. Belo
