DILI, 18 Juñu 2025 (TATOLI)-Governu sei realiza Konferénsia Komunidade Luzu-Aziátiku ba dahaat ne’ebé sei hala’o iha loron 27 to’o 29 Juñu 2025 iha Sentru Konvensaun Dili (CCD, signifika portugés).
Proposta ida-ne’e aprezenta husi Primeiru-Ministru, Xanana Gusmão, no Prezidente Autoridade Turizmu Timor-Leste (ATTL, IP), Virgílio Smith, liuhusi reuniaun Konsellu Ministru kuarta ne’e.
Tuir dokumentu ne’ebé Tatoli asesu, konferénsia ida ho lema “Unidu iha Diversidade — Dezafiu no Oportunidade sira hosi Legadu Sekulár ida”, edisaun dahaat husi konferénsia ida-ne’e, ne’ebé koñesidu mós hanesan Asian Portuguese Community Conference – APCC, sei halibur reprezentante husi komunidade sira ho orijen portugeza iha Ázia, liuliu husi Malaka (Malázia), Makau, Sri Lanka, Goa (Índia), no Myanmar, Togu no Flores (Indonézia), Tailándia no Timor-Leste.
Dokumentu ne’e hateten programa ne’e sei inklui diskursu ofisiál, palestra, meza redonda, eventu kulturál no projesaun dokumentáriu sira. Durante eventu ne’e, Deklarasaun Díli mós sei aprezenta no asina, ho objetivu atu kria Asosiasaun Komunidade Luzu-Aziátika (APCA).
Jornalista: Arminda Fonseca
Editora: Maria Auxiliadora
