DILI, 09 Jullu 2025 (TATOLI)—Diretór Empreza Starking, Lay Siu Hing, hateten Starking Medical prepara ona rekursu umanu hodi hein funsionamentu.
“Daudaun ne’e ita-nia funsionáriu hamutuk 120 maibé seidauk iha alvu loloos tanba seidauk rekruta hotu ajente limpeza seguransa no espesialista sira-ne’e. Karik rekruta hotu ona mak funsionáriu sei sa’e bae ma 140 no hein funsionamentu,” Lay Siu Hing informa ba Agência TATOLI, liuhusi telefónika, ohin.
Husi funsionáriu 120 ne’e, nia infroma, kompistu husi enfermeira, parteira no doutór sira maibé seidauk konta espesialista na’in-tolu ne’ebé husi estranjeiru.
“Espesialista na’in-tolu (3) ne’e ita sei halo kontaktu ho sira bainhira sira mai to’o ona iha Timor-Leste mak ita foin halo kontratu ho sira,” nia relata.
Nia dehan, parte Starking Medical Center prepara ona karta ba Ministériu Saúde hodi hetan lisensiamentu no sei haruka funsionáriu na’in-11 hodi ba prátika iha Hospitál Nasionál Guido Valadares (HNGV), atu eleva funsináriu sira-nia koñesementu ba iha Farmásia, Laboratóriu no Banco de Sangue.
“Kona-ba ami-nia ekipamentu médiku, ami instala ona banhira funsionamentu ne’e la’o ona bele utiliza hodi halo atendementu,” nia esplika.
Antes ne’e, ekipa Starking Medical Center hala’o enkontru ho Hospitál Nasionál Guido Valadares hodi haruka funsionáriu nain 11 atu eleva sira-nia koñesementu ba iha farmásia, laboratóriu no Banku de Sangue.
Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, informa Starking nia dirijente sira halo ona sorumutu ho dirijente HNGV hodi halo akordu tékniku ba funsionariu sira ne’ebe atu mai aprende iha HNGV.
“Sira ne’e mai atu aprende eleva sira-nia konesimentu no kapasita sira-nia abilidade iha hospitál hodi hein sira-nia lisensiamentu husi Ministériu Saúde banhira sira hetan ona lisensa, tanba prosesu ne’e la’o hela,” Vidal Lopes dehan.
Nia afirma, tuir informsaun husi sira katak sei halo insatalasaun mákina sira ba Starking Medical Center ne’e la’o hela no prosesu ba lisensiamentu mós la’o hela.
“Ne’e mak sira hakarak aproveita tempu mamuk ne’e haruka sir- nia funsionariu mai hodi mai aprende hamutuk ho laboratóriu, farmásia, banco de sangue hodi hetan koñesementu. Karik aban banrua mak Ministériu Saúde fó ona lisensa no instala hotu ona sira-nia ekipamentu sei ba fali Starking atu servisu iha ne’eba ho koñesementu baziku ne’ebé mak sira iha,” nia hateten.
Jornalista : Felicidade Ximenes
Editór : Cancio Ximenes
