DILI, 09 Jullu 2025 (TATOLI)-Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hato’o agradesimentu ba dedikasaun no kontribuisaun membru polísia ne’ebé dedika ona sira-nia vida ba instituisaun desde tinan-2000.
“Governu organiza hodi realiza promosaun tranzitóriu hanesan rekoñesimentu servisu membru PNTL nian. Agradese ba ita-boot sira-nia dedikasaun, kontribuisaun ba instituisaun no ba rai ida-ne’e, mezmu ho kondisaun ne’ebé mak ho idade ba beibeik ona, dala-ruma ho kondisaun moras, maibé ita rekoñese hodi konvida ita-boot sira halo impozisaun deviza”, Komisáriu hatete bainhira realiza impozisaun deviza ba membru PNTL na’in-haat ne’ebé hala’o iha Kuartél Jerál PNTL, Kaikoli, ohin.
Henrique promete, Komandu sei la husik membru sira mesak, tanba esforsu tomak ne’ebé mak membru-sira fó ba instituisaun no rai-ne’e, hahú 2000 harii PNTL, sira mós hola parte iha prosesu.
“Kuandu sira labele la’o, ita bá tula deviza ba sira, nune’e iha loron hira ba kotuk bainhira hetan kontaktu husi Diretór Departamentu Lojístika nian katak membru na’in-haat bele la’o mai to’o Kuartél Jerál, entaun ita bele realiza iha ne’e”, katak nia.
Membru na’in-haat ne’ebé hala’o knaar iha Departamentu Lojístika no Departamentu Manutensaun Komandu Jerál PNTL Kaikoli, maka hanesan Ajente Xefe Polísia Roberto Lopes promove ba Postu Sargentu Xefe Polísia, Ajente Xefe Polísia Cipriano dos Reis Santos promove ba postu Primeiru Sargentu Polísia no Ajente Xefe Polísia José Belo promove ba postu Primeiru Sargentu Polísia nune’e mós nembru ajente Xefe Polísia Victor Belo, promove ba Primeiru Sarjentu.
Komandante polísia ne’e hatutan tan, dezenvolvimentu no progresu polísia nian nafatin konta ho membru sira, to’o tempu reforma mós sei nafatin konta ho membru sira ne’ebé dedika-aan tomak durante ezisténsia.
“Parabéns ba ita-boot sira no obrigadu ba família sira-nia partisipasaun, nafatin komunika ho komandu karik iha buat ruma, nune’e bele haree saida maka komandu presiza apoiu”, nia dehan.
Serimónia impozisaun deviza ne’e hahú husi loron 27 fulan Marsu tinan 2025 no iha fulan hirak ba kotuk ne’ebé realiza ona iha munisipiu no unidade sira.
“Ita-nia membru na’in-haat ne’ebé ita-halo imposizaun deviza, sira labele partisipa tanba sira-nia kondisaun saúde la permite, tanba ne’e ita-halo fali serimónia imposizaun deviza ba sira”, Hendrique dehan.
Notísia relevante: Membru PNTL 2.000-resin promovidu iha ámbitu komemorasaun ezisténsia ba dala-25
Jornalista : Natalino Costa
Editora : Rita Almeida
