DILI, 10 Jullu 2025 (TATOLI)–Prezidente Repúblika (PR), José Ramos Horta, admite katak durante enkontru semanál ho Primeiru-Ministru (PM), Kay Rala Xanana Gusmão nunka ko’alia kona-ba remodelasaun.
“Ko’alia kona-ba asuntu lubuk ida, buat seluk la’ós kona-ba lista remodelasaun, maibé ko’alia kona-ba seguransa, kona-ba polítika internasionál buat sira ne’e. Kona-ba remodelasaun iha ka laiha, ho Primeiru-Ministru nunka ko’alia ba ida-ne’e. Primeiru-Ministru mak hatene, ne’e Primeiru-Ministru nia mandatu,” PR Horta hato’o ba jornalista iha ámbitu abertura Konferénsia internasionál ‘Sidade Amiga’ entre Timor-Leste no Austrália, iha salaun Nobre Ministériu Negósiu Estranjeiru (MNEK,) Praia dos Coqueiros, Kinta ne’e.
Notísia relevante : Remodelasaun kompeténsia Primeiru-Ministru
Xefe Estadu nota, daudaun ne’e populasaun kontente ona tanba atividade infraestrutura barak.
“Ema kuaze hotu-hotu simu kompensasaun, dezenvolvimentu boot sei akontese mós iha Tasi-tolu, iha tasi-ibun husi Portu Dili to’o Kristu Rei. Purtantu ne’e Primeiru-Ministru mak hatene, halo remodelasaun halo, lakohi halo remodelasaun mós nia mak hatene,” nia akresenta.
PR Horta haktuir, nia enkontru ho Ministru Prezidénsia Konsellu Ministru, Agio Pereira foin lalais ne’e la ko’alia kona-ba reforma ba membru Governu tanba ne’e la’ós ministru nia kompeténsia.
“Ha’u fó parabéns ba Ministru Agio Pereira, serbisu ne’ebé Governu halo agora ne’e, atividade barak loos, oinoin la’ós hein de’it buat ne’ebé internasionál, atividade oinoin fulan sira-nia laran ne’e ita-boot sira haree,” Xefe Estadu katak.
Nia dehan, iha munisípiu sira, ho infraestrutura estrada, hanesan Ermera atu avansa bá Atsabe tun bá Bobonaro.
“Agora komesa hahú hadi’a estrada ba Laklubar nian, embora ne’e la sufisiente. Tanba iha suku, aldeia balun izoladu nafatin, iha Bobonaro araska loos. Purtantu mak ne’e ita labele ezije buat hotu-hotu tinan ida-ne’e, tinan 2026 mak ha’u espera tau investimentu boot iha fronteira tomak, Norte bá Súl. Nune’e bele moderniza rede estrada, ospitál, klínika, agrikultura, transporte públiku,” PR Horta katak.
Jornalista : Osória Marques
Editora : Julia Chatarina
