DILI, 11 Jullu 2025 (TATOLI) – Bee Timor-Leste, Empreza Públika (BTL, E.P) arrekada reseita millaun $1,1 ba kofre Estadu durante Janeiru no Juñu 2025.
Prezidente Komisaun Ezekutiva BTL, E.P, Gustavo da Cruz, hateten reseita ne’e mai husi fonte sira hanesan kanalizasaun bee, selu bee kada fulan husi kontadór, teste bee iha laboratóriu, fa’an bee-moos, fakar bee-fo’er no seluk tan.
Tuir projesaun husi Ministériu Finansa, BTL iha tinan ne’e e presiza hetan reseita millaun $2,4. “Maibé, agora rekolla ona millaun $1,1. Ida-ne’e pasu pozitivu ba ami”, Gustavo da Cruz dehan ba Tatoli, ohin.
BTL nafatin halo esforsu hodi kontinua halo melloramentu ba sistema abastesimentu bee iha Dili, inklui munisípiu sira nune’e bele kontribui maka’as ba reseita, tanba BTL nafatin monta kontadór ba komunidade ne’ebé asesu ona ba bee-moos.
BTL instala ona kontadór iha munisípiu Aileu, Baukau, Maliana no seluk tan. Iha Dili monta ona rihun 24-resin.
Lembra katak, iha 2021, BTL transforma ba empreza públika no kontribui reseita ba Estadu. Tuir estimativa, iha 2021, BTL presiza rekolla reseita rihun $170 no iha nia implementasaun arrekada $256.461. Iha 2022, tau estimativa rihun $250 no konsege ultrapasa ba $611.532. Iha 2023, hasa’e projesaun ba $948.005 no rekolla millaun $1 no iha 2024, hasa’e ba millaun $1 no arrekada liu $1,6.
Notisía relevante: BTL rekolla reseita millaun $1,6 iha tinan kotuk
Jornalista: Arminda Fonseca
Editora: Maria Auxiliadora
