DILI, 23 jullu 2025 (TATOLI) – Atleta Ayrine Calumia Ismael ba dahuluk lori nia nasaun Mosambike konkista pontu dahuluk iha Ronda Datoluk kompetisaun xadrez klásiku feto nian iha Jogu Desortivu CPLP XII.
Vitória ne’e mosu hafoin Mosambike halakon São Tomé e Prínsipe iha jogu ne’ebé hala’o iha Sentru Konvensaun Dili (CCD) no konklui iha tuku 11:41 OTL.
Ronda datoluk, ne’ebé hala’o iha loron 23 Jullu 2025, iha tuku 9:10 dadeer, Oras Timor-Leste nian, lori mós vitória ba Portugál no Angola.
Portugál halakon uma-na’in Timor-Leste iha tuku 10:17 dadeer OTL, enkuantu Angola halakon Cabo Verde iha tuku 11:26 dadeer OTL. Ekipa tolu ne’e hotu hetan pontu ida-idak hosi jogu sira ohin nian.
Jogu xadrez klásiku feto nian ne’e halo parte iha Jogu CPLP XII, hala’o iha loron 21 to’o loron 25 fulan-jullu tinan 2025. Ronda tuirmai sei kontinua iha loron 24 Jullu, ho ronda dalimak hodi determina vensedór.
To’o ronda datoluk, Portugal no Angola lidera klasifikasaun ho pontu 3 ba nasaun ida-idak. Kabu Verde, Timor-Leste, no Mosambike tuir ho pontu 1, enkuantu São Tomé e Prínsipe la konsege marka pontu.
Lista partisipante sira iha Torneiu Xadrez Klásiku Feto nian iha CPLP kompostu husi :
- Lizete de Sousa (Timor-Leste) – La iha Klasifikasaun
- Ayrine Calumia Ismael (Mosambike) – La iha Klasifikasaun
- Sofia Moreira Lopes Rosas Valente (Portugal) – Klasifikasaun Padraun 1959
- Daniela de F. Santana da Cruz (Angola) – Klasifikasaun Padraun 1542
- Akiane Patricia Brito Moreno (Kabu Verde) – Klasifikasaun Padraun 1509
- Emelissa Mallone do Ó de Moura (São Tomé e Príncipe) – La iha Klasifikasaun
Torneiu xadrez CPLP XII 2025 fahe ba kategoria tolu : klásiku (standar), rápidu, no blitz. Jogu ida-idak hetan supervizaun husi árbitru na’in sia husi Timor-Leste no árbitru internasionál na’in haat husi Portugál, São Tomé e Prínsipe, no Cabo Verde.
Jornalista : Cidalia Fatima
Editora : Armandina Moniz
