DILI, 28 Jullu 2025 (TATOLI) – Jogu Desportivu Komunidade País Ko’alia Lian Portugés (CPLP) Edisaun da-12, ne’ebé realiza tinan ne’e iha Timor-Leste sai nu’udar oportunidade ba Governu atu dezenvolve liután área ne’e.
Xefe bankada KHUNTO, António Verdial de Sousa, elojia Governu ne’ebé organiza eventu referidu iha modalidade oioin, tanba la’o ho di’ak.
Tuir nia, ida-ne’e parte ida mós atu lori Timor-Leste ba mundu no hanesan timoroan sente onradu, tanba país sai uma-na’in ba eventu internasionál ne’e hodi halibur nasaun maun-alin atu hametin lasu amizade, kooperasaun no troka esperiénsia no promove espíritu kompetitivu ida saudavel.
António Verdial salienta katak eventu ida-ne’e sai mós oportunidade ba Ezekutivu atu mellora kondisaun infraestrutura desportu iha modalidade oioin, inklui kria kondisaun adekuada ba atleta timoroan hodi dezenvolve sira-nia talentu.
“Ami husi KHUNTO, ezije nafatin ba Governu, antes mandatu ne’e ramata, harii akademia desportu, hodi prepara atleta timoroan ho di’ak. Sujere ba Ezekutivu atu mellora kondisaun infraestrutura desportiva iha modalidade oioin”, nia hateten ba Tatoli iha Parlamentu, ohin.
Tan ne’e, presiza investimentu iha área desportu hanesan moto ne’ebé iha hodi dezenvolve desportu sai orgullu nasionál.
Iha parte seluk, deputadu ne’e sujere atu iha futuru halo selesaun riguroza ba jogadór no atleta timoroan atu partisipa iha eventu internasionál no presiza selesaun ne’e to’o bá munisípiu hotu hafoin mai nasionál.
Lembra katak Timor-Leste sai uma-na’in ba Jogu Desportivu CPLP ne’ebé hala’o durante loron 17 to’o 27 Jullu ne’ebé mai ho lema “Unidu Ita Ida De’it”.
Eventu internasionál ida-ne’e reúne atleta atus ba atus husi nasaun-membru CPLP, inklui Angola, Kabuverde, Mosambike, Saun Tomé no Prínsipe no Portugál. Maski Brazíl, Giné-Bisau no Giné Ekuatoriál la partisipa iha edisaun ne’e, kompetisaun konta ho modalidade ualu: futeból, tenis kampu, voleiból praia, karaté-do, taekwondo, xadres, basketeból no atletizmu.
Notísia relevante: Xanana enserra Jogu CPLP ho destaka ba espíritu uniaun no amizade
Jornalista: Nelson de Sousa
Editora: Maria Auxiliadora
