Penang, 20 Juñu 2026 (TATOLI)– Sekretáriu Estadu Komunikasaun Sosiál (SEKOMS), Expedito Loro Dias Ximenes, akompaña husi Prezidente Ajénsia Notisioza TATOLI, I.P, Noémio Mateus Soares Falcão, reuniaun ho Ministru Komunikasaun Malázia, Datuk Fahmi Fadzil, akompaña husi estrutura husi Ajénsia Notisioza BERNAMA.
Iha enkontru ne’e, parte rua diskute oportunidade kooperasaun iha área komunikasaun entre Malazia no Timor Leste.
Biban ne’e, parte rua troka hanoin kona-ba oinsá bele hametin relasaun bilaterál liuliu iha setór komunikasaun no média, ho objetivu atu aumenta kapasidade instituisaun sira no promove dezenvolvimentu informasaun ne’ebé profisional, kredível no responsavel.
Tema prinsipál sira ne’ebé sai nu’udar asuntu diskusaun mak kooperasaun iha utilizasaun no regulasaun Intelijénsia Artifisial, estratéjia atu kombate lia falsu no dezinformasaun, no importánsia husi formasaun kontinua ba jornalista sira iha Timor-Leste atu hasae kualidade reportajen no adapta ho mudansa teknolójika.
Iha oportunidade ne’e, Sekretáriu Estadu Komunikasaun Sosiál, Expedito Loro Dias Ximenes, mós hato’o preokupasaun kona-ba nesesidade atu iha prezensa no envolvimentu plataforma dijitál boot sira hanesan Google, YouTube no Facebook iha Timor-Leste, atu bele fó kontribuisaun di’ak liu ba ekosistema média no komunikasaun nasional.
Iha fatin hanesan, Ministru Komunikasaun Malázia, Datuk Fahmi Fadzil, iha nia intervensaun subliña katak kooperasaun entre Malázia no Timor-Leste iha área komunikasaun sei sai kle’an liutan ho implementasaun akordu kooperasaun ne’ebé asina ona entre Ajénsia Notisioza BERNAMA no Ajénsia Notisioza TATOLI.
Nia hateten katak akordu refere sei sai baze importante ida atu promove partilla esperiénsia, dezenvolvimentu rekursu umanu, troka informasaun no fortalesimentu kapasidade profisionál ba instituisaun média governamental iha nasaun rua, hodi responde ba dezafiu komunikasaun iha era dijitál.
Jornalista: Anito Soares
Editór: Florencio Miranda Ximenes
