DILI, 29 Jullu 2025 (TATOLI) – Empreza Montana Diak hahú nahe ona alkatraun ba konstrusaun estrada iha ponte B.J Habibie to’o Kuluhun.
Tuir observasaun Tatoli iha terrenu, alkatraun ne’e hahú nahe horisehik no nia progresu husi projetu ne’e atinje ona 65%, tanba sei nahe ba kamada rua.
Xefe Planeamentu Ministériu Obra Públika (MO), Tito Edgar, esplika katak daudaun ne’e, nahe alkatraun foin tama parte dahuluk nian hafoin kontinua ba daruak. Bainhira ida-ne’e finaliza sei hadi’ak trotoár no jardín ba ema la’o ain nian.
Tito Edgar salienta katak totál alargamentu estrada husi ponte B.J Habibie to’o Kuluhun nia luan variavel, hahú husi metru 22 to’o 80. “Ida-ne’e inklui parkiran parte liman karuk no loos, no la’o ain. Enkuantu nia naruk hamutuk metru 1,187”, nia adianta.
Alvu ba projetu ne’e rasik sei termina iha tinan ne’e. Alargamentu estrada ne’e halo ho orsamentu hamutuk millaun $2,3.
Relembra katak, iha loron 16 Abríl 2024, ekipa liderada husi Sekretaria Estadu Asuntu Toponímia no Organizasaun Urbana (SEATOU) sobu barak hamutuk 95 iha eis Pasar Senggol Bidau to’o Kuluhun hodi konstrui fatin ne’e ba estrada pista rua, ne’ebé daudaun ne’e fui ona alkatraun.
Notísia relevante: https://tatoli.tl/2025/02/06/antigu-pasar-senggol-bidau-sei-halo-estrada-pista-rua/
Jornalista: Arminda Fonseca
Editora: Maria Auxiliadora
