DILI, 06 Fevereiru 2025 (TATOLI) – Ministériu Obra Públika (MOP) deside konstrui fatin antigu Pasar Senggol iha Bidau ba estrada pista rua ka dua jalur no sei la halo ba jardín.
Ministru Obra Públika, Samuel Marçal, hateten planu antes ne’e atu konstrui Pasar Senggol ba jardín no nia dezeñu kompletu hotu ona, maibé tanba haree alargamentu estrada bá Becora maka deside Sengol halo ba estrada hotu.
“Tanba ita alarga estrada bá Becora mak Bidau Senggol la loke luan, ida-ne’e afeta ba engarrafamentu, tanba ne’e mak ita muda dezeñu halo pista ba estrada husi Ponte B.J Habibie, Bidau Senggol sa’e bá to’o Kuluhun Bekora”, Samuel Marçal dehan ba Tatoli, iha Palásiu Governu horisehik.
Governante ne’e dehan empreza ne’ebe daudaun halo hela serbisu mak Montana Diak Unipessoal Lda. ho durasaun kontratu ba halo estrada pista rua ne’e hamutuk fulan neen ho totál orsamentu $2.301.894,47.
Relembra katak, iha loron 16 Abríl 2024, ekipa lideradu husi Sekretaria Estadu Asuntu Toponímia no Organizasaun Urbana (SEATOU) sobu barak hamutuk 95 iha eis Pasar Senggol Bidau to’o Kuluhun.
Ekipa ne’e kompostu husi SEATOU, Polísia Nasionál Timor-Leste, FALINTIL-Forsa Defeza Timor-Leste, Ministériu Obra Públika, Terra no Propriedade, Jestaun Merkadu Munisípiu Dili no entidade relevante seluk tan.
Ekipa konjunta ne’e ezekuta serbisu bazeia ba dekretu-lei númeru 3/2024 17 Janeiru, alterasaun dahuluk dekretu-lei númeru 33/2008, 27 Agostu, kona-ba Ijiene no Orden Públika. Nune’e mós tuir dekretu-lei númeru 51/2016, 28 Dezembru, kona-ba Lisensiamentu Mesajen Publisitária, no dekretu-lei númeru 2/2017, 22 Marsu, kona-ba Sistema Jestaun Rezíduu Sólidu Urbanu, inklui dekretu-lei númeru 3/2017, 22 Marsu, kona-ba Rejime Zona Estasionamentu Durasaun Limitada.
Notísia relevante : https://tatoli.tl/2024/04/16/ekipa-konjunta-sobu-barraka-95-okupa-espasu-publiku-iha-bidau/
Kona-ba despeju administrativu iha Fomentu II, Komoro no Bebonuk, Governu deside hasai komunidade uma-kain besik 400 iha fatin referidu no la’ós intensaun atu harii jardín ruma, maibé tanba hela iha fatin risku.
“Ita hasai komunidade iha ne’ebá la’os intensaun atu harii jardín, maibe hasai tanba fatin risku. Ho ida-ne’e, ita muda sai husik fatin ne’ebá hadi’a halo di’ak, nune’e udan tun mota halai tuir nia dalan”, Samuel adianta.
Notísia relevante : https://tatoli.tl/2025/01/04/seatou-muda-sai-populasaun-iha-fomentou-ii-comoro/
Jornalista : Arminda Fonseca
Editora : Maria Auxiliadora
