DILI, 30 Jullu 2025 (TATOLI)–Prezidente Repúblika (PR), José Ramos Horta hala’o vizita traballu privadu bá Repúblika Indonézia hahú husi loron 30 to’o 31 fulan Jullu 2025, hodi hametin diplomasia akadémika, harii dame, no reforsa parseria entre Timor-Leste no Indonézia.
Tuir nota ne’ebé Ajénsia TATOLI asesu husi media Palásiu Prezidensiál, Prezidente Horta sei hato’o diskursu iha Universidade Gadjah Mada (UGM) iha Yogyakarta, ho títulu ‘Servisu Komunitáriu nu’udar Fundasaun ba Lideransa Globál’, hodi inspira estudante no akadémiku sira hodi tradús inisiativa sira iha baze ba solusaun eskalavel sira ba pás no dezenvolvimentu sustentável.
Prezidente mós sei envolve ho komunidade akadémika no kulturál Indonézia nian, inklui vizita ida ba Festivál Arte UGM nian, hodi subliña kbiit arte iha promosaun kompreensaun interkulturál.
Notísia relevante : PR Horta sei simu títulu honoris causa husi Universidade Taylor’s Malázia
Iha Jakarta, Prezidente Horta sei hala’o diálogu estratéjiku ho líder Indonéziu no sei hala’o diskursu públiku iha Sentru Estudu Estratejiku no Internasionál (CSIS) hodi reforsa kompromisu Timor-Leste nian ba estabilidade rejionál no unidade ASEAN nian.
Vizita ne’e subliña Timor-Leste nia dedikasaun atu habelar kooperasaun bilaterál ho Indonézia, koloka UGM nu’udar sentru ba diálogu estratéjiku no avansa aspirasaun partillada ba rejiaun ida-ne’ebé pasífika no prósperu.
Jornalista : Hortencio Sanchez
Editór : Cancio Ximenes
