MALÁZIA, 18 Juñu 2025 (TATOLI)-Prezidente Repúblika, José Ramos Horta, sei simu títulu Doutor honoris causa husi Universidade Taylor’s Malázia iha loron aban, 19 Juñu 2025.
Atribuisaun ne’e hanesan rekoñesimentu husi universidade ba Xefe Estadu nia kontribuisaun iha área diplomasia internasionál, direitu umanu no dezenvolvimentu nasionál.
Atividade seluk ne’ebé sei partisipa husi Komandante Supremu F-FDTL mak forum ho naran “Global Leadership & Dialogue Initiative (GLDI)”.
Premiadu Nobel ba Dame iha tinan 1996 sei sai hanesan oradór prinsipál iha kolokiu ne’e hodi promove pás, justisa sosiál, étika lideransa iha nivel mundiál no aborda esperiénsia Timor nian, perspetiva umanista no diálogu konstrutivu.
Durante estadia, Primeiru-Ministru Malázia, Dato Seri Anwar Ibrahim, sei oferese jantár ho fraternizasaun ba Prezidente Repúblika, José Ramos Horta, hodi hametin relasaun bilateral, ne’ebé Malázia hanesan parseiru xavi no apoiante tempu naruk ba Timor-Leste nian adezaun ba ASEAN.
Delegasaun to’o iha aeroportu internasionál Kuala Lumpur iha tuku 16:30 oras Malázia nian, simu direta husi Embaxadór Timor-Leste ba Malázia, Lisualdo Gaspar. Ekipa diretamente ba otél St. Regis Kuala Lumpur hanesan fatin deskansa durante estadia.
Husi Malázia, Xefe Estadu ho delegasaun sei kontinua bá Mónaku, iha ne’ebé vizita ofisiál ida-ne’e marka ona ba loron 23 to’o 25 Juñu.
Husi Mónaku, Prezidente Repúblika sei halo enkontru ofisiál ho autoridade sira no partisipa iha kompromisu diplomátiku sira ho nível aas. Pontu importante mak sesaun interativu ho estudante internasionál liu 40, promove diálogu kona-ba asuntu globál no fahe esperiénsia dezenvolvimentu úniku Timor-Leste nian.
Programa ne’e inklui almosu ho nivel aas, hamutuk distintu konvidadu na’in 20, ne’ebé partisipa iha atividade sira husi Fundasaun Prínsepe Alberto II ne’ebé foka ba sustentabilidade ambientál no asaun klimátika.
Vizita sira ne’e mós subliña Prezidente Ramos-Horta nia esforsu kontinua diversifika parseria internasionál Timor-Leste nian no asesu oportunidade foun iha edukasaun, kuidadu saúde, no dezenvolvimentu sustentável.
Tuir planu, Xefe Estadu sei fila hikas mai Timor-Leste iha loron 27 fulan-Juñu tinan 2025.
Notísia relevante: PR Horta ho delegasaun dezloka ona ba Malázia
Jornalista : Hortencio Sanchez
Editora : Rita Almeida
